Euskal Kopa irabazi du Bera Berak
Bera Berako jokalariak, Zuazoren aurka Euskal Kopako finala irabazi ostean. (Argazkia: Bera Bera) 
Bera Berak Euskal Kopako finala jokatu zuen astearte iluntzean Zuazo talde barakaldarraren aurka Zumaian (Gipuzkoa), eta koparekin itzuli dira Donostiara, finala nagusitasunez irabazita: 31-17. Lehenengo zatitik utzi zuen argi Bera Berak irabaztera zihoala, Erauskinen eta Gavilanen kontraerasoek gidatuta, alde handiarekin aurretik jarri baitzen markagailuan (16-11).
Goraino bete zen Lubaki kiroldegiak txalo artean agurtu zituen donostiarrak atsedenaldian. Bigarren zatian, neurketaren erritmoa jaitsi egin zen, baina Imanol Alvarezen neskek ez zioten golak egiteari utzi, eta garaipena ez zen une bakar batez ere arriskuan egon.
