Zuhaitz berriak landatuko ditu udalak Katalunia plazan
Donostiako Udala datorren astelehenean hasiko da Katalunia plazako zuhaitzak aldatzen, gehienak egoera txarrean daude-eta. Carlos Garcia Hiri Mantentzeko zinegotziak adierazi duenez, “parke eta lorategietako udal zerbitzuek plazako ale asko hondatuta daudela ohartarazi dute, estres hidrikoa izan baitute azken aldiko tenperatura altuen ondorioz. Une honetan, plaza horretako zuhaitz asko lehor daude, edo ez dute etorkizun- perspektiba handirik. Klima-baldintza berriekiko erresistenteagoak diren espezieak landatuko ditugu, eta ale gazteak hiriko beste eremu batzuetan birlandatuko ditugu”.
Gaur egun, Katalunia plazan 62 zuhaitz daude, hainbat espezietakoak eta, bestetik, hutsik dauden txoko batzuk, bertako zuhaitzak egoera txarrean egonda, moztu egin baitziren. Dozena bat ale beste eremu batzuetan birlandatuko dira, gehienak magnoliak.
“Sail berriak berrogeita hamar zuhaitz inguru izango ditu, baldintza klimatikoekiko ez ezik, Katalunia plazarekiko ere erresistenteagoak izango direnak. Izan ere, Katalunia plaza plaza gogor bat da, itsas-ingurunetik hurbil dagoelako, eta horrek ere baldintzatzen du espezieen garapena”, adierazi du Garciak. “Honako zuhaitz hauek landatuko dira: Schinus molle edo Piper Zuhaitz Faltsuak, 30 ale; Kalistemoak, 12 ale; loratutako zuhaitz txikiak, eta Cinnamomum Camphora edo Kanforrondoa, 8 ale. Azken hauek berriak dira Donostian, eta Galtzada Nagusitik hurbil dagoen plazaren aldean joango dira.”
Lanak azaroaren 27an hasiko dira, astelehenarekin, San Frantzisko kalera ematen duen plazako espaloian, eta, gero, gainerako alboetatik jarraituko dira. Ondo bidez, lanek aste bana iraungo dute plazaren alde bakoitzean. Esku-hartze horren aurrekontua 72.000 eurokoa da, eta obrek hiru asteko iraupena izango dute, betiere baldintza klimatologikoen zain.
