La Perlako langileek elkarretaratzea egin dute lan hitzarmen berria eskatzeko
La Perlako langileek lantokiaren parean egin dute elkarretaratzea eguerdian, LAB eta ELA sindikatuek deituta, lan baldintzak hobetu eta hitzarmen berria eskatzeko. Txilibuak ezpainetan, lan baldintzan hobetzearen aldeko aldarriak oihukatu dituzte, baita eskuorriak banatu ere. Azaldu dutenez, bi hitzarmen mota dituzte langileek: lehena ostalaritzakoa da, eta horren baitan jarduten dute kafetegiko langileek; bigarrena, baina, ile apaindegikoa da, eta bertan sartzen dituzte talasoterapiako eta gainerako langileak, haien lana oso bestelakoa izan arren, langileek salatu dutenez.
Adierazi dutenez, arazo nagusia hitzarmenetik dator, baina horri lan karga, egutegiekin dituzten arazoak, eta jaiegun gisa hartzen ez diren lan egunak gehitu behar zaizkie. “Jai egun guztietan edo ia guztietan egiten dugu lan ostalaritzan ez gaudenok, eta horren aurka ez gauden arren, konpentsazioa eskatzen dugu denbora libreaz harago”. Egutegiak ere berandu iristen direla adierazi du Olatz Aranburu, La Perlako harrerako langileak: “Ostalaritzan nahiz eta urteko egutegirik ez izan, hiru hilabetekoa izaten dute. Gainerako langileen kasuan ordea, igandetik igandera aldatuz doa eta igandea iritsi arte ez dakigu zer ordutegi dugun hurrengo astean. Eta ezinbesteak, hori aldatu beahr dugu kontziliazioa lortzeko”.
Egun oso protesta egiteko asmotan, eguerdiko elkarretaratzeaz gain, beste bi mobilizazio egin dituzte egunean zehar, 16:00-16:30 bitarte eta 20:00-20:30 bitarte. Negoziaziorik ezean, “borrokan jarraitzeko eta kaleak hartzeko” asmoa dutela berretsi dute.
Hona hemen eguerdiko elkarretaratzeko argazkiak:
