Lidl supermerkatuetako langileek manifestazioa egin dute zubiko lehen greba egunean
LABek deituta, Gipuzkoako Lidl supermerkatuetako langileek bi greba egun dituzte abenduko zubian “soldata eta baldintza duinen alde”. Lehen mobilizazio eguna gaurkoa izan da eta manifestazioa egin dute La Perlatik Bulebarreraino. Langileek azaldu dutenez, behin eta berriro baldintzak hobetzeko eskaerak helarazi arren, zuzendaritzak entzungorrarena egiten duela etengabe. “Proposamenak bidaltzerakoan beti erantzun berdina jasotzen dugu, begiratuko dutela. Denbora hori, ordea, ez da iristen eta jendea haserre eta nazkatuta dabil”, azaldu du Aloña Espinosa langileak. Era berean, adierazi du ezinbesteko aldaketak behar dituztela, besteak beste kontziliazioa bermatu eta dagozkien eskubideak lortzeko: “Gipuzkoako hitzarmenean dagoen kategoria berdinketa eskatzen dugu, abenduaren 24 eta 31ean 15:00etan ateak ixtea, garraioaren gehigarria jasotzea eta azterketa ofizialak egiteko ordaindutako baimena izatea, besteak beste”.
Erdiguneko kaleak igaro ondoen bilduta zeuden dozenaka lagunek Maialen Lujanbioren bertso baten bertsioarekin amaitu dute mobilizazioa Bretxako supermerkatuaren atarian. Nolanahi ere, ez da aldarrikapenak zabaltzeko izango duten egun bakarra. Izan ere, bigarren greba eguna izango dute larunbatean, hilak 9.
Hona hemen manifestazioko argazkiak:
