Udal batzordeak streaming bidez emateko eskatu du Elkarrekin Donostiak
Victor Lasa eta Arantza Gonzalez, Elkarrekin Donostiako zinegotziak. (Argazkia: Elkarrekin Donostia) Elkarrekin Donostiak udaleko batzordeak online ematen hasteko eskatu du, “gardentasunean irabazteko asmoz”. Egun, ateak itxita egiten dira batzordeok, eta prentsa akreditatuak soilik dauka horietarako sarbidea, baina debekatuta dago bilerak grabatzeko gailuak erabiltzea.
Hori “anomaliatzat” dauka koalizioak, eta osoko bilkuraren araudi organikoa aldatzea proposatu du, batzorde horiek herritarrei zabaltzeko. “Gardentasuna ezinbestekoa da benetako tokiko demokrazia izan dezagun”, adierazi du Victor Lasa bozeramileak. Gipuzkoako Batzar Nagusietan hala egiten dela gogoratu du Lasak, nahi duen orok batzordeak streaming bidez jarraitu baititzake.
