Aitor Zabaleta eta beste 33.000
Lehen minutuan, Realeko jokalariek partida eten zuten; epaileak eta Betiseko jokalariak errespetatu egin zuten. (Argazkia: Reala) Egun berezia izan zen igandekoa realzaleentzat. Aitor Zabaleta Atletiko Madrileko ultra batek erail zuela 25 urte bete ziren pasa den abenduaren 8an, eta hura omentzeko jarduerak antolatu zituzten gizonezkoen lehen taldeak Betisen aurka jokatu zuen partidaren atarikoan, eta partidaren amaieran. 16:15ean hasi zen partida, baina ordubete lehenago zuten hitzordua realzaleek, Bultzadak deituta, Anoeta kanpoaldean. Bertan, Zabaletaren familiari babesa eskaini zioten ehunka zalek, eta familiak esker oneko hitzak izan zituen. Jokin Aperribai Realeko presidenteak ere lore sorta bat eman zion sendiari.
Partida bukatzearekin batera, Realak prestatu zuen omenaldia hasi zen, Anoetan bertan. Izaro abeslariak Txoria txori kantua abestu zuen, bertaratu ziren 33.000 ikusleren laguntzarekin, eta Mikel Oiartzabal egungo kapitainak eta Agustin Aranzabal garai hartakoak 25 zenbakia duen Realeko elastikoa eman zioten Zabaletaren amari.
🎶 Eta nik… txoria nuen maite 💙#WeareReal pic.twitter.com/RCQCH6H3yF
— Real Sociedad Fútbol (@RealSociedadEUS) December 17, 2023
Partidari dagokionez, hutsean berdindu zuten Realak eta Betisek, baina horrek ez du esan nahi partida aspergarria izan zenik, ezta gutxiagorik ere. Realari, esaterako, hiru gol baliogabetu zizkioten, eta bi aldiz bidali zuen balioa zutoinera; Betisek ere izan zituen bere aukerak, baina ez zen Remiroren atea zulatzeko gai izan. Beraz, Realeko jokalariek ezin izan zioten Aitor Zabaletari garaipenik eskaini.
Emakumezkoek, hain justu, Atletiko Madrilen zelaian jokatu zuten larunbatean, eta bana berdindu zuten. Partida ona jokatu zuten Natalia Arroyorenek, eta merezitako berdinketa lortu zuten aurkari zail baten zelaian. Zazpigarren postuan dira orain sailkapenean.
Saskibaloian, bi talde donostiarrek irabazi zuten. Ibaeta Basketek Ensino talde galiziarra hartu zuen mendean 58-65, eta garaipen horri esker aurre hartu diete sailkapenean; zazpigarrenak dira orain. Gipuzkoa Basketek, bestalde, 80-90 irabazi zion Castellori. Garaipen horrek denboraldi amaieran goiko postuetan geratzeko erronkarekin jarraitzeko aukera eskainiko die.
PARTIDAK
Futbola
Gizonezkoen liga, 17. jardunaldia
- Reala 0 — Betis 0
Emakumezkoen liga, 12. jardunaldia
- Atletico Madril 1 — Reala 1
Saskibaloia
Emakumezkoen liga, 12. jardunaldia
- Ensino 58 — Ibaeta Basket 65
Gizonezkoen bigarren mailako liga, 13. jardunaldia
- TAU Castello 80 — Gipuzkoa Basket 90
