«Historiako aurrekontu handiena» izango du udalak aurten, iaz baino %4 gehiago
Eneko Goia alkateak 2024an zein legealdi berrirako planteatzen diren erronka nagusiak azaldu ditu, Donostiak izango dituen “proiektu garrantzitsuak” zerrendatuz.
Goiak nabarmendu duenez, “aspalditik martxan dauden proiektu asko azken fasera igaroko dira edo amaitzen joango dira datozen urte hauetan; eta, hasiko diren beste proiektu asko amaitutakoan, gure hiriak itxura guztiz berritua eskainiko du”.
Alkatearen arabera, aurtengoa Donostiarentzat “bultzadaren urtea” izango da. 2024ko aurrekontua onartzea da udalaren berehalako erronka, eta Goiak adierazi duenez, “udal gobernuan egonkortasuna izateko aukera emango du, eta proiektu asko gauzatzea ahalbidetuko du”.
Aurreratu duenez, aurtengo aurrekontua iazkoa baino %4 handiagoa izango da, baina gogorarazi du udala “bere historiako finantza-kredituko eragiketarik handienean” sartuko dela, “Loiolako Kuartelak erosteko eragiketaren ondorioz”.
Izan ere, azaldu duenez, eragiketa hori izan da 2023ko “mugarrietako bat”. Datozen urteetan garatuko da, eta lehen urratsak emango ditu eremurako Nazioarteko Lehiaketarekin. Loiolako Kuartelak dauden lekuan 1.700 etxebizitza berri sortzea ahalbidetuko du erosketa horrek.
Garapen berriak eta proiektuen amaiera
Loiolako Kuarteletarako prozesua hasteaz gain, hiria pixkanaka berrantolaketa urbanistikoan aurreratzen joango da, Lorategi Hiriko urbanizazioa burutzeko lanekin jarraituz, eta Infernua, Igara eta Illarrako eremu berriak garatzeko obrekin hasiz. Horrez gain, Martuteneko espetxea eraitsiko dute Txomin Enearen bigarren fasearekin hasteko, eta San Bartolome merkataritza gunea garatzea ere aurreikusten du udalak.
Horrekin batera, Hiri Antolamenduko Plan Orokorraren Aurrerapena onartu eta plana idazten hasiko dela azaldu du Goiak. Ildo horretan, ostatu erabilerei buruzko egungo Plan Orokorraren aldaketari hasierako onarpena ematea ere aurreikusten da, “hotel berrien lizentzien etenaldia beste urte batez luzatzeko”.
Halaber, aurten beste proiektu zehatzago batzuk burutuko dira, hala nola Antso Jakitunaren alde bikoitiaren espaloia urbanizatzea, Bidebietako parkea berritzea, Anoeta ingurua urbanizatzeko lehen fasea, Txaparrene pasealekua eraberritzea, Martuteneko biribilgunea egiten hastea eta bukatzea, San Martin eta Bretxa merkatuak berritzea, Zurriola Maritimorako proiektu berria abian jartzea eta Kontxako baranda berritzeko azken fasea, alkateak zehaztu duenez.
Mugikortasuna
Mugikortasunari dagokionez, hiriko Mugikortasun Plana onartu ondoren, etorkizuneko mugikortasunerantz urratsak ematen jarraituko dutela azaldu du alkateak. Nabarmendu duenez, “oinez edo bizikletaz joatea bezalako modu aktiboak sustatzera, garraio publikoa bultzatzera eta hori guztia erraztuko duten hiri inguruneak sortzera bideratuta dago”.
Garraio publikoari dagokionez, udalak Dbusen flota berritzeko lanean jarraituko du, eta Monseko kotxetegiak elektrifikatzen hasiko da, “autobus elektrikoak erosi baino lehen, horiek kargatu ahal izateko azpiegitura egoki bat izateko”, gogorarazi du Goiak. Gainera, bizikleta bidezko mugikortasuna bultzatzeko, hiriko bizikleta sarea hobetzeko lanean jarraituko du udalak, eta Bidebieta eta Trintxerpe lotzen dituen bidegorri zati estrategikoak amaituko ditu. Era berean, Bulebarraren, Erregina Erregeordearen eta Zurriolako zubiaren arteko zatirako proiektua hasiko du, “bidegorria zuzena izan dadin eta bide osoa alde bakarretik egin ahal izateko”.
Eta, alkatearen esanetan, topoaren trazadura handitzea izango da Donostiak etorkizunean izango duen mugikortasunaren trakzio elementuetako bat. Goiak nabarmendu duenez, hainbat urtez gainazalean eragina izan ondoren, “2024an iritsiko da hiriaren erdigunean funtsezkoak diren eremuetarako lasaitasuna, eta hainbat gune berrurbanizatzeko bidea emango du, hala nola, Easo eta Xabier Zubiri kaleak”.
Eta udal gobernuarentzat beste proiektu giltzarri bat Isuri Gutxiko Eremuarena izango da. Aurreikuspenen arabera, urtearen amaieran ezarriko da, datozen hilabeteetan aplikazio esparrua adosteko egingo den partaidetza prozesuaren ondoren.
Kirola, kultura eta ezagutza
Goiak bere agerraldian azpimarratu duenez, aurten, beste mugarri batzuen artean, 100 urte beteko dira Eduardo Txillida jaio zenetik. Hori dela eta, “mendeurrena urteko erreferentzia kulturaletako bat” bihurtu nahi dute, eta Donostia “nazioarteko kultura fokuan jarri”. Horretarako, udalak Haizearen Orraziaren mendi magala birmoldatzeko lanei ekitea du helburu, Kostaldeetako Zuzendaritzak baimena ematen dionean.
Bestalde, 2024ko beste helburu nagusietako bat kirola indartzeko beharrezko elementuak izatearen alde egiten jarraitzea da. Alkateak adierazi duenez, gakoetako bat “honekin zerikusia duten erakundeekin akordio bat lortzea izango da, Illunbe eraberritzeko eta erabilera anitzeko pabiloian bihurtzeko”. Eta akordioa lortu bitartean, azaldu du udala ahaleginduko dela gainerako kirol instalazioak berritzen, hala nola miniestadioa handitzea, belodromoaren estalkia berritzea edo Anoetako estadioaren ingurua urbanizatzen hastea.
Hiriaren garapenaren beste ardatzetako bat Donostia marka “Zientzia eta Ezagutzaren Hiri” gisa sendotzeko bultzada izaten jarraitzea da, garrantzi handiko ekintza estrategikoekin, hala nola Ilunbeko Parke Teknologikoa handitzea, ordenagailu kuantikoaren egoitzaren eraikina eraikitzea, Donostia International Physics Center (DIPC) eraikin berria egiteko obrak hastea, eta MUBILek Eskusaitzetan duen egoitza amaitzea eta Elektromugikortasunaren Poloa abian jartzea.
Beste proiektu batzuk
“Donostiarren bizi kalitatea hobetzeko asmoz”, beste hainbat proiektu ere landuko ditu udalak, hala nola zaharren etxeetan hobekuntzak egitea edo Villa Salian Hestia berria eta Abegi Etxea hartzeko lanak amaitzea.
Udalak Donostia Eskura app berria ere aurkeztuko du datozen hilabeteetan. Eneko Goiak azaldu duenez, honek “herritarrei aukera emango die udal administrazioarekin kudeaketak eta izapideak modu eroso, azkar, eta errazean egiteko”.
Baina udalak berak bultzatutako proiektuez gain, beste eragile eta erakunde batzuek martxan jarritako beste proiektu handi batzuek ere indartuko dute hiria. Horien artean, alkateak honako hauek nabarmendu ditu: “Donostia Ospitaleko Osasun Hirian egingo diren hobekuntzak (aparkaleku berria, Protonterapia eraikina eta Lehen Mailako Arretako eraikina), Bretxan dagoen Erdigunea-Alde Zaharra Osasun Zentro berria, edo Basque Culinary Centerren GOe eraikina eraikitzeko lanak abian jartzea”.
