Ostatu eskola bihurtu da Uba aterpetxea
Aterpetxe eskola martxan da, eta ostatu jardueraz gain (44 logela eta 196 plaza ditu), beste hainbat zerbitzu ere baditu: jatetxea, garbitegia, aparkalekua, etab.
Uba aterpe-eskola aurkeztu dute gaur.Donostiako Udala 
Uba aterpetxea enplegu inklusiboko “proiektu berritzaile” bihurtu da, egoera ahulean dauden edo laneratzeko zailtasunak dituzten gizarte taldeen artean lan aukerak sortzera bideratua. Helburu horrekin, aldaketak aterpetxe eskola izateko aukera emango dio, eta ostatua eta ostalaritza emateko jarduera sektore horretako prestakuntza jarduerekin eta lan praktikekin bateragarri egingo ditu. Donostiako Udalak Donostia Sustapenaren bidez bultzatuta, ekimenak Eusko Jaurlaritzako Lan eta Enplegu Sailaren babesa du.
Marisol Garmendia Ekonomiako eta Bertako Enplegurako zinegotziak proiektuaren izaera berritzailea azpimarratu du, Ubako instalazioak optimizatu eta beraien “lehentasunen zerbitzuan” jartzeko aukera ematen duelako: “Enplegu politikak bultzatzea da gure lehentasuna, Donostiak EAEko eta estatuko langabezia tasarik txikiena duen hiriburua izaten jarrai dezan, lan munduan sartzeko zailtasun gehien dituzten gizataldeei lagunduz. Esaterako, 45 urtetik gorakoei, emakumeei eta lan esperientziarik gabeko gazteei lagunduz”. Gainera, proiektuak ostalaritza eta ostatu sektorean lan egiten duten pertsonen kualifikazioa “hobetuko” duela adierazi du Garmendia –ia 8.000 donostiarrek egiten dute lan bi sektore horietan–.
Ubako aterpetxe eskola berriak Donostia Sustapenak zuzendu duen apustu publikoan du jatorria, ostatu eta ostalaritza sektoreetan dauden enplegu beharrak eta laneratzeko zailtasunak dituzten gizataldeak elkarrekin konektatzeko, gizatalde horien artean prestakuntza egokia zabalduz. “Mota horretako zailtasunak are nabarmenagoak dira 45 urtetik gorakoen artean (urriko azken datuen arabera, 6.737 langabetuen %58,5 baitira) eta emakumeen artean, genero arrakala handia dela-eta 1.000 emakume gehiago baitaude langabezian, gizonezko langabetuen kopuruarekin alderatuta”, azaldu dute.
Aterpetxe eskola martxan da, eta ostatu jardueraz gain (44 logela eta 196 plaza ditu), beste hainbat zerbitzu ere baditu: jatetxea, garbitegia, aparkalekua, etab.
Kudeaketa, Suspertu enpresaren esku
Kudeaketa, lizitazio prozesu baten ondoren, Suspertu-EDE fundazio gizarteratze enpresari esleitu zaio, eta lan merkatuan sartzeko zailtasunak dituzten kolektiboekin lan egiten duten beste gizarte eragile batzuen lankidetza izango du. Proiektua prestakuntza erakundeekin eta sektoreko enpresekin lankidetzan garatu nahi da, “beharrak identifikatzeko eta eskaintza eta prestakuntza ibilbideak hautemandako premietara egokitzeko”.
Udalaren arabera, Suspertu EDE fundazioak sustatutako laneratze enpresak “esperientzia handia” du 2005etik ostalaritzako eta turismoko zerbitzuen kudeaketan, eta langabetuentzako eta enplegagarritasun arazoak dituztenentzako lanpostuak sortzen ditu. Jon Basaldua Suspertu-EDE fundazioko arduradunak azaldu duenez, “helburu horrekin kudeatzen dugu Ubaren proiektua, eta dagoeneko hamar lanpostu sortu dira lau lantaldetan (harrera, kafetegia, garbiketa eta mantentze lanak)”.
Basalduak zehaztu duenez, “Ubaren asmoa herritar guztiei zerbitzu irekia ematea da, ez bakarrik Ostatuan ostatu hartzen dutenei. Bereziki, kafetegia eta jatetxea bultzatu nahi ditugu, eskaintza interesgarria eta kalitatezkoa eginez Donostiako bizilagunentzat, eta ez soilik ostatu hartzen dutenentzat”.
Proiektuak Eusko Jaurlaritzako Lan eta Enplegu Sailaren laguntza du, eta 198.000 euroko kopurua jaso du 2024 eta 2025 urteetarako. Bi prestakuntza ibilbide finantzatuko dira: sukaldaritzako oinarrizko lan praktikak eta ostatuetan solairuetako oinarrizko lanak egitea batetik, eta gainerakoarekin, hainbat inbertsio egingo dira espazioak egokitzeko eta berritzeko.
