Ziklo festa antolatu dute Antiguan larunbaterako
Masa Kritikoaren martxa bat, Donostian. Masa Kritikoa 
Hurrengo ostiralean botako dute Antiguako jaietako txupinazoa, baina larunbat honetan bizikletak hartu eta jaietarako motorrak berotzen hasiko dira, egun osoko ziklo festarekin. Antiguoko Ziklokros Kinkia taldeak, jai batzordeak, Kalapie elkarteak eta Txantxarreka gaztetxeak antolatu dute egitasmoa.
11:00etan hasiko dira Bentaberri plazako haurrentzako ziklo ginkanarekin. 12:00etan, gaztetxean, We Are Traffic! masa kritikoaren inguruko dokumentala proiektatuko dute, eta Kalapie elkarteko kideek hitzaldia eskainiko dute.
Luntx musikatua egingo dute 14:00etan Txalupagilene plazan, eta ziklokros kinkia egingo dute bazkalostean (16:30) Pio Barojako parkean. 18:00etan, ziklo festa musikatua egingo dute auzoko kaleetatik, eta, amaitzeko, 19:00etan, ziklo kontzertua eta DJ emanaldia antolatu dituzte, sari banaketarekin batera.
