San Jose ikastetxeko Anir Guyenbat Danbor Nagusiak zuzenduko du aurtengo haur danborrada
4.731 haurrek hartuko dute parte, eta XIX. mendeko gizarteko pertsonaiak San Jose eta Santa Teresa ikastetxeetako haurrek gorpuztuko dituzte.
Haur danborradako pertsonaiak aurkeztu ditu gaur Jon Insausti Kultura zinegotziak, udaletxean. (Argazkia: Sara Ibarguren) 
San Sebastian egunean 4.731 haurrek hartuko dute parte haurren danborradan, eta hiriko kaleak zeharkatuko dituzte Sarriegiren martxak interpretatuz. 12:00etan hasiko da, eta 41 ikastetxe edo elkarte aterako dira, 48 konpainia osatuz. Konpainia horien guztien buru San Jose ikastetxeko Anir Guyenbat Danbor Nagusia izango da. Berak zuzenduko du udaletxetik abiatuko den danborrada. Callate la Boca etxeko Oscar Caslak egin ditu irudi berriak, eta hiriaren kolore adierazgarri gisa, urdina eta zuria aukeratu ditu uniformeetarako, danborradaren erreferente izan daitezen eta festan parte hartzen duten elkarte eta kolektibo guztiek erabil ditzaten.
Udaletxeko balkoitik haur danborradari hasiera emateko bi laguntzaile izango ditu Danbor Nagusiak: jenerala eta laguntzailea. Santa Teresa Ikastetxeko Alazne Neire Herrador izango da aurtengo jenerala eta Elaia Peman Saenz de Santamaria laguntzailea.
Azken urteotan bezala, haur danborradarekin batera karroza handi bat aterako da. Bertan, XIX. mende hasierako gizarte zibileko pertsonaiak egongo dira herritarrak agurtzeko. Aurtengoan, Santa Teresa ikastetxeko haurrek interpretatuko dituzte alkatea, notarioa, Donostiako bi hiritar (neska eta mutila), batelaria, arrantzalea, inudea, artzaina, irulea, dendaria, urketaria eta mandazaina. Karrozaren aurretik, sei palafrezainek desfilatuko dute Kalesan.
Santa Teresa Ikastetxeko Marko Etxezarreta Hermida izango da alkatea, Sofia Novac notarioa, June Carrillo Arroyo hiritarra, Naroa Briones Zamora eta Haizea Parra Blacio batelariak, Julen Martin Gomez arrantzalea, Maialen Lozano Lamarain eta Noa Usabiaga Martinez iruleak, Ion Burleigh Arranz artzaina, Ane Etxezarreta Hermida dendaria, Sara Ramos Abad urketaria, eta Iñigo Lopez-Para Prieto mandazaina.
50 urte bete ditu Maria Reinaren danborradak
Maria Reina eskolak 50 urte beteko ditu haur danborrada atera zuenetik. 1973.urtean, eta hainbat alditan saiatu ondoren, Vicente Val Donosti Gaineko lehendakariak konpainia berriaren arduradun gisa konpromisoa hartu eta elkartea konprometitu zuen. Orduz geroztik haur danborradan ateratzen da, eta estandartean elkartearen, ikastolaren eta parrokiaren izenak agertzen dira.
Eguraldi txarra bada, beste data posibleak
Urtarrilaren 20an eguraldiak utziko ez balu, haur danborrada igandean, urtarrilaren 21ean, egingo litzateke. Eta 21ean ospatu ezingo balitz, urtarrilaren 28an egingo litzateke azken saiakera, udalak jakinarazi duenez.
