San Mames hartzera doa Reala
Etxetik kanpo jokatuko dute Realeko mutilek eta neskek, Bera Berak eta Txuri Urdineko mutilek; Ibaeta Basketek eta Gipuzkoa Basketek, aldiz, etxean.
Realaren eta Athleticen arteko derbi bateko irudi bat. 
Egutegian gorriz markatutako egun horietako bat iritsi da Realeko mutilentzat, San Mamesera baitoaz larunbatean, Athleticen aurkako derbia jokatzera. Bolada oso on batean murgilduta daude zuri-gorriak, baina txuri-urdinak hazi egiten dira partida handietan, eta halakoa izango da San Mamesekoa, beraz, ez dago ezer erabakita. Bestalde, neskei dagokienez, Sporting Huelvaren etxean jokatuko dute igandean, kopako laugarren kanporaketako partidan. Ligako azken sailkatuak dira etxekoak, eta, beraz, partida erosoa izan beharko luke txuri-urdinentzat.
Saskibaloian, Ibaeta Basketek Araski hartuko du etxean igandean. Ligako hamargarren sailkatua da Araski eta seigarrenak dira donostiarrak, beraz, goiko postuengatik borrokatzen jarraitzeko garaipen bat lortzeko partida aproposa da Ibaeta Basketentzat. Bestalde, Gipuzkoa Basketek Estudiantes ligako liderra hartuko du etxean gaur, eta donostiarrentzat partida zaila izango dela aurreikusten da.
Eskubaloian, Atletico Guardesen etxean jokatuko du Bera Berak larunbatean. Ligako bigarren postuan daude donostiarrak eta lidergoa eskuratzea da euren helburu nagusia, beraz, garaipena eskuratzera joango dira Atletico Guardesen etxera.
Azkenik, izotz hockeyan, Milenio Panthersen etxean jokatuko dute Txuri Urdineko mutilek larunbatean, eta eurentzako urteko lehenengo partida izango da. Ligako azken sailkatuak dira etxekoak, beraz, urtea ondo hasteko garaipen bat eskuratzeko partida egokia da donostiarrentzat.
PARTIDAK
Futbola
Gizonezkoen liga, 20. jardunaldia
- Athletic — Reala (larunbata, 13, 18:30)
Emakumezkoen Espainiako Kopa, laugarren kanporaketa
- Sporting Huelva — Reala (igandea, 14, 12:00)
Saskibaloia
Emakumezkoen liga, 17. jardunaldia
- Ibaeta Basket — Araski (igandea, 14, 12:00)
Gizonezkoen bigarren mailako liga, 17. jardunaldia
- Gipuzkoa Basket — Estudiantes (ostirala, 12, 21:00)
Eskubaloia
Emakumezkoen liga, 14. jardunaldia
- Atletico Guardes — Bera Bera (larunbata, 13, 20:00)
Izotz hockeya
Gizonezkoen liga, 14. jardunaldia
- Milenio Panthers — Txuri Urdin (larunbata, 13, 20:55)
