Igeldoko Toki Entitate Txikia eratzea adostu du Donostiako Udalak
Igeldoko plaza. Beñat Parra 
Donostiako Udalak Igeldoko Toki Entitate Txikia eratzea erabaki du, eta baita Toki Erakunde Txikiaren oinarri izan behar duen lurraldeko hautesleei kontsulta egitea ere. Kontsulta udalbatzak eratze erabakia hartu ondoren egin beharko da, hautesleek haren sorrerari buruz duten iritzi ez-loteslea lortzeko.
Eneko Goia alkateak gaur adierazi duenez, “Toki Entitate Txikia behin betiko eratzeko bidean aurrera egitea ahalbidetzen digun beste urrats bat emango dugu, behin proiektua onartuta eta jendaurrean ikusgai egoteko epea amaituta, ez baita alegaziorik aurkeztu”.
Orain, udalbatzak berretsi egin beharko du Gobernu Batzarrak hartutako erabakia, bai eta kontsultarako deialdia, prozedura, egin beharreko galdera eta horrekin lotutako beste xehetasun batzuk ere.
Kontsultarako planteatzen duten galdera honako hau da: Ados al zaude Igeldoko Toki Entitate Txikia sortzearekin?
Erantzun posibleak BAI edo EZ izango dira, eta ezarritako hautetsontzian gutunazal itxi baten barruan sartuko den boto-paper batean adieraziko dira. Emandako botoan erantzunik ematen ez bada, boto zuritzat hartuko da.
Bozketa presentziala izango da, eta apirilaren 14an egingo da, 09:00etatik 20:00etara, Itsas Aurre eraikinean (Igeldoko plaza, 4). Deialdia udalbatzak kontsulta egitea onartzen duen unean (2024ko otsailaren 22an, ziurrenik) Igeldoko Toki Entitate Txikirako mugaketaren barruan erroldatuta dauden 16 urtetik gorako pertsona guztiei egingo zaie.
Aldez aurretik bozkatu ahal izango da apirilaren 8tik 12ra, aurretiko hitzordua eskatuta Partaidetza Zerbitzuaren bulegoetan (Easo kalea 43, 1. eskuina), baina ez da eskuordetutako botoa onartuko.
Bozketa amaitutakoan, mahaiak botoen zenbaketa publikoa egingo du eta emaitza zehaztuko du. Aldeko emaitza izanez gero, espedientea Gipuzkoako Foru Aldundira bidaliko da, Foru Dekretu bidez ebatz dezan.
Emaitza Toki Entitate Txikia eratzearen aurkakoa bada, organo eskudunak jendaurrean eta arrazoituta adieraziko du kontsultaren emaitzak nola eragingo duen proiektuaren bilakaeran.
