Emakunde Saria eman diote Mariasun Landari, emakumeen ahalduntzearen alde egindako lanagatik
Mariasun Landari eman diote 2024ko Emakunde Saria.Irekia 
Berdintasunerako Emakunde Saria eman diote Mariasun Landa Etxebeste idazleari, neskato, nerabe eta emakumeen berdintasun eta duintasunari egindako ekarpen sortzaileagatik. Atzo jaso zuen saria Landak, Iñigo Urkullu lehendakariaren, Nerea Melgosa Berdintasun, Justizia eta Gizarte Politiketako sailburuaren eta Miren Elgarresta Emakundeko zuzendariaren eskutik.
Lehendakariak eskerrak eman zizkion Landari, bereziki, haurrei eta gazteei zuzendutako bere obragatik, honen bidez aukera ematen dielako “mundua ezagutu duten bezala zalantzan jartzeko, galdera berriak egiteko, balioak eta bizi ereduak transmititzeko”.
Urkulluk azpimarratu du beharrezkoa dela “eredu berdinzaleak izatea fikzioan eta bizitzan, mundu hobea, bidezkoagoa, bizigarriagoa eta berdintasunezkoagoa irudikatzeko gai diren emakumeak eta gizonak”. Ildo horretan, Nerea Melgosa Berdintasun, Justizia eta Gizarte Politiketako sailburuak gogorarazi du Emakunde Sariak hiru hamarkada baino gehiago daramatzala hainbat pertsona, erakunde eta elkartek berdintasunaren alde egindako lana ikusarazten eta baloratzen.
Literaturaren alorrean egindako lanaz gain, Landaren ibilbide bikaina goraipatu zuen Melgosa sailburuak: “Gaur idazle batek bere literatur ekoizpenaren bidez egindako ekarpenaz gain, emakume batek bere militantzia feministaren bidez gizarteari egindako ekarpena, euskararekiko, irakaskuntzarekiko eta beste dibulgazio lan batzuekiko konpromisoaren bidez egindako ekarpena ere saritzen ditugu”.
Emakundeko zuzendari Miren Elgarrestak epaimahaiaren argudioak gogorarazi zituen Landari saria emateko aho batez hartutako erabakian: “Aitzindaria izan da haur literatura modernoan, emakumeen mundua ulertzeko modu berri bat islatzen duelako. Neska eta nerabeen pertsonaia ausartak eta autonomoak eraiki ditu, sentiberak baina ausartak; mundua ikuspegi harrituarekin baina jarrera kritikoarekin begiratzen duten neskak”.
Elgarrestak azaldu zuenez, Landari emandako Emakunde Sariarekin, “fikziozko munduak eraikitzen dituzten sortzaileen ekarpena” ere aitortu nahi dute, “bestelako mundu bat, berdintasunezkoagoa, irudikatzeko aukera ematen digutelako”.
Mariasun Landaren ibilbidea
Beste hizkuntzetara gehien itzulitako egileetako bat da Mariasun Landa, eta bere hautagaitza REDAGI Gipuzkoako Emakume Elkarteen Federazioak bermatu du.
Bere militantzia feminista aktiboa nabarmentzen da, 1980eko hamarkadaz geroztik Donostiako Emakumeen Asanbladan, Literaturaren Didaktikako irakasle titular gisa egindako unibertsitate irakasle lanaz gain, dibulgazio jarduera zabal bati gehitu baitzitzaion, gaur egungo feminismoaren historian eta genealogian funtsezkoak diren beste emakume batzuen lanari buruzko artikulu, ikastaro eta hitzaldien bitartez.
Landaren lan oparoak hainbat literatur sari jaso ditu: Haur eta Gazte Literaturako Lizardi Saria, 1982an; Haur eta Gazte Literaturako Euskadi Saria, 1991n; eta Haur eta Gazte Literaturako Sari Nazionala, 2003an. 2014an, Eusko Ikaskuntza-Laboral Kutxa Humanitate, Kultura, Arte eta Gizarte Zientzien Saria jaso zuen, eta 2016an, Rosalia de Castro Saria. Landa, gainera, Jakiundeko (Zientzia, Arte eta Letren Akademia) kidea da.
