Emakumeek zientzian, artean eta letretan egiten duten lana ikusarazten duen erakusketa jarri dute Zuloaga plazan
'24 emakume zientzia, arte eta letretan' erakusketa otsailaren 28ra arte egongo da ikusgai Zuloaga plazan. Jakiunde 
24 Emakume zientzia, arte eta letretan erakusketa estreinatu du Jakiunde akademiak Zuloaga plazan, eta akademiako kideen erretratuak eta hausnarketak ditu protagonista. Otsailaren 28ra arte egongo da ikusgai.
Jakiunde zientzia, arte eta letren akademiak 107 kide ditu gaur egun, eta horietatik 33 emakumeak dira. Erakusketan horietako 24 azaltzen dira, 2022ko eta 2023ko Jakiundeko egutegien protagonistak, hain zuzen ere. Jakiunderen arabera, gaur egungo erronketako bat da emakumeek gure gizartearen aurrerapenean funtsezkoak diren jakintza arloetan egiten duten lana “ikusezin” bihurtzen duten “gizarte ohiturak gainditzea”. “Neskek eta mutilek edozein diziplinatan ezagutza eta lan praktika baldintza berdinetan eskura ditzaten, gure gizarteak emakumeen presentzia ezagutzaren arlo guztietan ezagutu eta ikusarazi behar du. Emakumeek zientzietan, arteetan eta letretan lan egiten dute, laguntzen dute eta beren lanarekin gozatzen dute”, nabarmendu du Jakiundek.
24 Emakume zientzia, arte eta letretan erakusketaren helburua errealitate hori gizarteari erakustea eta etorkizuneko belaunaldiak inspiratzea da. Erakusketak karrera profesional luze baten ondoren beren diziplinetan bikaintasuna lortu duten akademikoak aurkezten ditu, baita beren lanbidean punta-puntako lana egiten duten akademiko gazteenak ere.
