Erraldoiaren etxea hartu nahi du Realak
Kubo, Brais eta Merino, Txapeldunen Ligako partida batean sartutako gol bat ospatzen.Reala 
Denboraldia serio jartzen hasia da Realarentzat, eta sasoia markatu dezaketen hainbat partida jokatuko ditu datozen asteotan, tartean gaurkoa. Izan ere, iluntzean (21:00) jokatuko du Txapeldunen Ligako final-zortzirenetako joaneko partida, Paris Saint Germainen aurka, Printzeen Parkean.
PSGk begiz jota dauka Europako txapelketa gorena, ez baitu inoiz irabazi, eta hori da azken urteotako bere helburu nagusia, Nasser Al-Khelaifi eta Qatarreko bere dirua Frantziako hiriburuko taldera iritsi zirenetik. Milioiak eta milioiak inbertitu dituzte ordutik munduko jokalari onenak fitxatzen, eta Frantziako Liga erraz irabazi ohi badute ere, Txapeldunen Ligan ez dute asmatzen. Hala ere, beraiek dira Realaren aurkako kanporaketa gainditzeko faborito nagusiak, gauzak diren bezala. Askoz aurrekontu altuagoa dutelako, esperientzia gehiago duelako Txapeldunen Ligan —azken urteotan, bederen—, eta izen handiko jokalariak dituelako, bereziki Kylian Mbappe aurrelaria, munduko jokalari onenetakoa dena egun.
Realak ez du ezer oparituko, ordea, eta Txapeldunen Ligan orain arte erakutsitako mailarekin argi utzi du edonor garaitzeko gai dela. Horrela, gaurkoan emaitza on bat lortzea da txuri-urdinen helburu nagusia, Anoetako itzulerako partidara (martxoak 5) bizirik iritsi eta realzaleen babesarekin paristarrak mendean hartzeko. Halaber, gaurkoan ere ez da bakarrik egongo taldea, 2.000 realzale inguru joan baitira Parisera.
Oiartzabal itzuli da
Azken partidetan baja izan ostean, Mikel Oiartzabal kapitaina deialdian sartu da, eta aurreikuspena da hamaikakoan sartuko dela. Horrek bultzada emango dio Realari, kapitaina ez baita edozein jokalari. Gainera, azkenaldian oso gaizki aritu dira txuri-urdinak golak sartzeko garaian, bereziki Sadiqen akats larriengatik. Hala ere, sei baja ditu Realak: Aritz Elustondo (zigortuta) eta Sheraldo Becker, Alvaro Odriozola, Kieran Tierney, Carlos Fernandez eta Aihen Muñoz min hartuta.
Horrela, Alguacilek galako hamaikakoa zelairatuko duela aurreikusten da: Remiro atean; Traore, Zubeldia, Le Normand eta Galan atzean; Zubimendu, Merino eta Brais erdian eta Kubo, Barrenetxea eta Oiartzabal aurrean. Luis Enriqueri dagokionez, honako hamaikakoa zelairatuko duela aurreikusten da: Donnarumma atean; Hakimi, Danilo, Marquinhos eta Lucas Hernandez atzean; Ugarte eta Zaire-Emery erdian eta Dembele, Asensio, Kolo Muani eta Mbappe aurrean.
Reala ez dago denboraldiko unerik onenean, baina oso bizirik dago hiru txapelketetan, eta behin baino gehiagotan erakutsi du partida handietan hazi egiten dela eta edozein talde garaitzeko gai dela, bere jokoa egiten duenean. Gaurkoa realzaleek ahaztuko ez duten neurketa horietako bat izan dadila, beraz.
