St. Patrick's Englisheko eta Ceinproko proiektuek irabazi dituzte 2023 Donostia Innovation Challenge sariak
Donostia Innovation Challengeko finala, Kursaalen.Donostiako Udala 
St. Patrick’s Englisheko Argibide eta Ceinproko Clean game proiektuek irabazi dituzte 2023 Donostia Innovation Challenge sariak. Lehenengoak Bigarren Hezkuntza/Batxilergoa kategoriako saria eskuratu du; bigarrenak, aldiz, Lanbide Heziketa kategoriakoa.
Lehen kasuan argi adimendunen sarea, sentsore eta hodeiko teknologiaren bidez hiriko argiteria publikoaren kudeaketa eraginkorragoa eta jasangarriagoa lortzen duen proiektua garatu da. Bigarrenari dagokionez, ozeanoak garbitu eta zaintzeko erronka eta misio birtualak dituen bideo jokoa, parte hartzaileak arazo horren inguruan sentsibilizatzen dituen proiektua da.
Proiektu berritzaileen bidez hiria hobetzeko teknologia berriak erabiltzea da udalak, Donostia Sustapenaren bidez, Donostia Innovation Challenge proiektuarekin abiarazi duen erronka. Bigarren Hezkuntzako eta Lanbide Heziketako hamar ikastetxetako 350 gaztek parte hartu dute ekimen horretan, eta helburua da talentua, talde lana eta berrikuntzari lotutako gaitasunak sustatzea.
Bost hilabetez, parte hartu duten hamar ikastetxeetako 350 ikaslek erakunde laguntzaileekin lankidetzan garatu dituzte beren proiektuak, eta, parte hartzaileen maila akademikoaren arabera, bi sari kategorietako batera aurkeztu dira: Bigarren Hezkuntza/Batxilergoa eta Lanbide Heziketa. Aurkeztu diren 73 proiektuetatik, Donostiako Sustapenak, erakunde laguntzaileen aholkularitzarekin, hiru finalista aukeratu ditu kategoria bakoitzean, eta epaimahai profesional bati aurkeztu zaizkio, Kursaalen izan den finalean. Azkenean, aipaturiko bi proiektuak izan dira garaile.
Proiektu irabazleez gain, beste finalistek irtenbide sortzaileak eta maila tekniko handikoak proposatu dituzte: adinekoentzako bastoi adimendun bat (Prius), hondakin flotatzaileak biltzeko robot bat (Aqueloo), paperontziak kontrolatzen eta jasotzen dituen robot bat (Reciclon), edo turistentzako laguntzaile digital bat (Gea).
