Ligako finalerdiak abiatuko ditu Txuri Urdinek
Etxetik kanpo jokatuko dute asteburuan Bera Berak eta Realeko eta Txuri Urdineko mutilek zein neskek; etxean, aldiz, Ibaeta Basketek eta Gipuzkoa Basketek.
Txuri Urdineko nesken partida bateko artxiboko argazki bat. 
Denboraldia serio jartzen hasi da Txuri Urdineko neskentzat, larunbatean jokatuko baitute ligako finalerdietako kanporaketako lehenengo partida, Huarteren etxean. Fase erregularra bikain gainditu dute, partida gehienak irabazita eta lider bukatuz, nagusitasun handiz. Orain, liga irabazi nahi dutela benetan erakusteko ordua da. Larunbatean jokatuko dute joaneko partida, eta hurrengo asteburuan itzulerakoa; berdinketan egongo balira bi neurketen ostean, hirugarren bat jokatuko lukete, hurrengo igandean bertan.
Bestalde, Txuri Urdineko mutilek Bartzelonaren etxean jokatuko dute larunbatean, ligako fase erregularreko azken neurketan. Ligako laugarren sailkatuak dira donostiarrak eta hirugarrenak katalanak, eta lehenengo laurak sailkatzen dira finalerdietarako, beraz, partida garrantzitsua da.
Futbolean, Mallorcaren etxean jokatuko dute Realeko mutilek igandean, eta Vila-realenean neskek larunbatean. Mutilen kasuan, hurrengo astean jokatuko duten kopako finalerdietako itzulerako partidaren aurrerapen moduan hartu dateke neurketa, Mallorcaren aurka izango baitute jokoan kopako finalerako txartela. Ligan, Europako postuak berreskuratu nahi ditu Realak, eta jaitsiera postuetatik aldendu nahi du Mallorcak. Bestalde, neskak dira larunbateko partida irabazteko faboritoak, valentziarrak hamabigarren sailkatuak baitira, eta txuri-urdinak zazpigarrenak.
Saskibaloian, Valentzia ligako liderra hartuko du etxean Ibaeta Basketek larunbatean. Ez da partida erraza izango, baina donostiarrek behin baino gehiagotan erakutsi dute edozeinen aurka direla gai aurrez aurre jokatzeko. Bestalde, Gipuzkoa Basketek Clavijo hartuko du etxean, ligako azken sailkatua. Tramite bat izan beharko luke neurketak donostiarrentzat, laugarren postuan baitaude, goikoei presioa egin nahian.
Azkenik, eskubaloian, Beti Onak taldearen etxean jokatuko du Bera Berak, ligako bederatzigarrenaren etxean. Lidergoan presioa sartzen jarraitu nahi dute donostiarrek, hirugarrenak baitira, Malaga liderretik bi puntura.
PARTIDAK
Izotz hockeya
Emakumezkoen ligako finalerdietako lehenengo partida
- Huarte — Txuri Urdin (larunbata, 17, 14:40)
Gizonezkoen liga, 18. jardunaldia
- Bartzelona — Txuri Urdin (larunbata, 17, 22:00)
Futbola
Gizonezkoen liga, 25. jardunaldia
- Mallorca — Reala (igandea, 18, 18:30)
Emakumezkoen liga, 18. jardunaldia
- Vila-real — Reala (larunbata, 17, 18:30)
Saskibaloia
Emakumezkoen liga, 21. jardunaldia
- Ibaeta Basket — Valentzia (larunbata, 17, 18:00)
Gizonezkoen bigarren mailako liga, 21. jardunaldia
- Gipuzkoa Basket — Clavijo (igandea, 18, 18:00)
Eskubaloia
Emakumezkoen liga, 18. jardunaldia
- Beti Onak — Bera Bera (larunbata, 17, 18:00)
