Eskura dute finalerako txartela
Etxean jokatuko dute asteburuan Txuri Urdineko neskek, Realeko mutilek eta Bera Berak; kanpoan, aldiz, Ibaeta Basketek.
Huarteren eta Txuri Urdinen arteko finalerdiko lehenengo partidako une bat.Izotz Gaineko Kirolen Espainiako Federazioa 
Txuri Urdineko neskek etxean lortu dezakete ligako finala jokatzeko txartela, bihar iluntzean Huarte nafarrei irabazita. Joanekoan 0-8 irabazi zuten etxetik kanpo, eta, beraz, aurreikuspena da klub donostiarra pasatuko dela finalera. Huartek irabaziko balu, ordea, hirugarren neurketa bat jokatu beharko litzateke kanporaketa erabakitzeko, eta Donostian bertan jokatuko litzateke, igandean. Hedabide honek Txuri Urdineko jokalari Naiara Maraurirekin hitz egin du aste honetan, hain justu.
Futbolean, gaur iluntzean jokatuko du Realak, Anoetan. Ligako azken jardunaldian garaipena eskuratu ostean, konfiantza berreskuratzen ari da Imanol Alguacilen taldea, eta hiru puntuak batu nahi ditu bere zaleen aurrean. Valentziarrak ligako hamahirugarrenak dira, eta Reala Europako postuei eutsi nahian dabil, beraz, garrantzitsua izango da garaipena eskuratzea.
Eskubaloian, Bera Berak Malagari eta Elxi lidergoan presioa sartzen jarraitzeko partida aproposa du bihar, Gijon hartuko baitu etxean, ligako azken-aurrena. Oso estu dago ligako lidergoa: 29 puntu ditu Elxek eta 28na andaluziarrek eta donostiarrek, bigarren eta hirugarren postuan, hurrenez hurren.
Saskibaloian, Gran Canariaren etxean jokatuko du Ibaeta Basketek larunbat iluntzean, ligako azken-aurrenaren aurka. Etxetik kanpo jokatuta ere, faboritoak dira donostiarrak, eta neurketa aproposa da garaipen bat eskuratu eta goiko postuetan egon nahi dutela erakusteko.
PARTIDAK
Izotz hockeya
Emakumezkoen ligako finalerdiak, itzulerako partida
- Txuri Urdin — Huarte (larunbata, 24, 20:30). Huartek irabaziko balu, igandean (hilak 25) jokatuko lukete hirugarren partida, Donostian, 14:30ean.
Futbola
Gizonezkoen liga, 26. jardunaldia
- Reala — Vila-real (ostirala, 23, 21:00)
Eskubaloia
Emakumezkoen liga, 19. jardunaldia
- Bera Bera — Gijon (larunbata, 24, 18:00)
Saskibaloia
Emakumezkoen liga, 22. jardunaldia
- Gran Canaria — Ibaeta Basket (larunbata, 24, 20:00)
