lilatoia

6.200 emakumek hartuko dute parte 2024ko Lilatoian

Matxoaren 3an, festa, kirola eta berdintasuna izango dira nagusi Donostiako kaleetan. Aurten, dortsal bakoitzeko euro bat emango diote Zaporeak elkarteari.

Olatz Balda @olatzbalda

2024/02/27

Matxoaren 3an, festa, kirola eta berdintasuna izango dira nagusi Donostiako kaleetan. Lilatoiaren 34. edizioa indartsu dator, eta emakumeek hainbat auzotako kaleak hartuko dituzte 5 kilometroko ibilbidean. Antolatzaileek “ia-ia dena prest” dutela, 2024ko Lilatoiaren aurkezpena egin dute gaur, 34. edizioaren xehetasunak azaltzeko. Adierazi dutenez, igandeko hitzorduan 6.200 emakumek* hartuko dute parte, eta jai giroan murgilduko dituzte Erdialdeko, Amarako eta Groseko kaleak.

Iñaki Gabarain Kiroletako zinegotziak, lasteketaren garrantzi soziala jarri du erdigunean. Zinegotziak, kirolaren “indar transformatzaileari” egin dio erreferentzia, Lilatoia lasterketa soil bat baino gehiago dela adierazteko: “Ekintza aldarrikatzaile eta feminista bat ere bada”, zehaztu du. Antzeko mintzatu da Mugimendu feministako Nati Rufo ere. Azaldu duenez, emakume* talde txiki batek abiatutako herri egitasmoa “mugarri” den lehiaketa bat izatera pasa da: “Berdintasunaren eta ahalduntzearen aldeko oihua da, eta lurraldean genero-berdintasuna indar eta mugimendu bilakatu da”.

1990an sortua, lasterketak aurrerapauso handiak eman ditu ditu emakumezkoen* kirolaren esparruan. Egun, berdintasunaren ikur izateaz gain, “egungo gizartearen isla” izatea iritsi dela baieztatu du Miren Elgarresta Emakundeko zuzendariak: “Hasieran ehunka baziren, egun milaka dira”. Adierazi du, halaber, emakumeen kirol zaletasuna bultzatzeko sortutako egitasmoak muga guztiak gainditu dituela. Azken urteotan, gainerako lasterketa eta kirol probetan emakumeen* kopurua igo da, eta proba handietan ere euren ikusgarritasuna normalizatzea eragin du. Kirol esparruan egindako oinkada zabalak irmoak diren arren, Emakundeko buruaren hitzetan, arrakala handia dago oraindik generoen artean, eta “emakume gazteek zailtasun gaindiezinak” topatzen dituzte “kirol ibilbiderako” bidean.

Martxoaren 3a

Egunotan kamisetak eta dortsalak jarri dituzte eskuragarri Euskal Herriko hamar bilketa guneetan. Gipuzkoako lurralde historikoan ez ezik, Gasteizen, Bilbon eta Iruñean ere egongo dira eskuragarri. Egunean bertan, berriz, 9:00etan geldituko dira parte hartzaile guztiekin Gipuzkoa Plazan, kontsigna zerbitzua bertan izango baitute. Horren ostean, zumba saioa izango dute 9:30etan, Bulebarreko kioskoan. 10:25etan abiatuko dira korrikalariak eta esku bizikleta modalitatean egingo dutenak. Festa giroa, baina, ez da lasteketarekin amaituko, oinkada luzeekin izerditu ostean, Lilapoteoa egingo baitute Parte Zaharreko kaleetan.

Erlazionatutako edukiaIRUTXULOKO HITZAko bi kazetari izango dira Lilatoiko esatariak