«Salbuespenez betea» eta «urria» den moratoria salatu du Bizilagunekin plataformak
Plataformak ezinbesteko ikusten du hirian hotel eta ostatu berriak zabaltzeko aukera oro ixtea. Horretarako, "hiri mailako elkarrizketa zabala" bideratu behar dela iritzi dute.
Bizilagunekin plataformak egindako mobilizazio bat, Parte Zaharreko kaleetatik barrena. 
Donostiako Udal Gobernuak hasierako onarpena eman dio ostatu erabilerei buruz Hiri Antolamenduko Plan Orokorraren aldaketari eta hurrengo Udal batzarrera hartuko du behin betiko onarpenaren erabakia. Aldaketa horrekin, urtebetez indarrean egondako establezimendu turistikoen moratoria beste bi urtez luzatuko du. Moratoria horrek, hain zuzen, hotelak, pentsioak, eta antzeko ostatu turistikoak mugatzea du helburu. Bizilagunekin plataformatik diotenez, ordea, udal gobernuak hartutako neurria, “salbuespenez betea eta urria da”.
Desazkunde turistikoaren aldeko plataformaren arabera, moratoria hori “erabaki antzua da”, azken urteotan “turistifikazioari eman zaion bultzada kontuan hartuta, sortutako kalteak leheneratzeko”. Azaldu dutenez, Plan Orokorrean Txertatutako neurriarekin ere, ostatu eta establezimendu berriak ireki daitezke Donostiako hamahiru auzotan; baita Igeldon eta Zubietan ere. Era berean, baieztatu dute zirrikitu legalak utzi dituztela bizitegi eremuetan lizentziak baimentzeko, eta ondare arkitektoniko gisa katalogatutako eraikinak ere ostatu bihurtu daitezkeela udalak hala erabakitzen badu.
Hori horrela, Bizilagunekinek ezinbestekotzat du hirian hotel eta ostatu berriak zabaltzeko aukera oro ixtea, bai eta ondare arkitektonikoaren zaintza bermatzea ere: “Neurri solte, partzial eta estetikoetan oinarritutako politikekin amaitu behar da”.
