Finalerdietarako txartela dute jokoan
Etxean jokatuko dute asteburuan Txuri Urdinek, Donostiako Atletikok eta Ibaeta Basketek. Kanpoan arituko dira, aldiz, belar hockeyko Reala eta Gipuzkoa Basket.
Txuri Urdin izotz jauregiko partida batean. 
Denboraldiko fase erabakigarrienean murgilduta daude Txuri Urdineko mutilak, eta Espainiako Kopako final-laurdenak jokatuko dituzte asteburu honetan, Donostiako Izotz Jauregian. Puigcerda izango dute aurkari, liga seigarren postuan amaitu duen taldea; donostiarrek laugarren postuan amaitu dute. Horrela, larunbat iluntzean jokatuko dute joanekoa eta igandean itzulerakoa —berdinketa izanez gero, luzapena jokatuko lukete igandean—; Bartzelona eta Huarte lehiatuko dira beste final-laurdenean. Jaca eta Majadahonda, ligako lehenengo bi sailkatuak, dagoeneko sailkatuta daude hurrengo asteburuan Jacan jokatuko diren finalerdietarako.
Belar hockeyan, Reala Atletic Terrassaren etxean arituko da igandean. Neurketa garrantzitsua izango da, aurkari zuzenak baitira katalanak eta donostiarrak: bosgarrena da Atletic Terrassa eta seigarrena Reala. Bestalde, gizonezkoen ligan, Donostiako Atletikok Club de Campo hartuko du etxean igandean. Neurketa zaila izango da, ligako bigarrenak baitira bisitariak, eta azkenak donostiarrak.
Saskibaloian, Ibaeta Basketek gaur jokatuko du etxean Gernikaren aurka. Lau partida gelditzen zaizkie donostiarrei liga amaitzeko, eta denboraldia ahalik eta hoberen bukatu nahi dute, lehenik eta behin Gernikari irabazita. Gainera, aurkari zuzenak dira bizkaitarrak, ligako bederatzigarrenak baitira, eta donostiarrak hamargarren postuan baitaude. Bestalde, Gipuzkoa Basketek Cantabriaren etxean jokatuko du larunbatean. Ligako hamaikagarrenak dira kantabriarrak eta seigarrenak donostiarrak, baina denboraldia are gorago amaitzeko aukera du Gipuzkoa Basketek, dena oso estu baitago goiko postuetan. Horrela, asteburu honetan garaipena eskuratzea garrantzitsua izango da.
PARTIDAK
Izotz hockeya
Gizonezkoen kopa, final-laurdenak
- Txuri Urdin — Puigcerda (larunbata, 6, 21:00)
- Txuri Urdin — Puigcerda (igandea, 7, 14:30)
Belar hockeya
Emakumezkoen liga, 15. jardunaldia
- Atletic Terrassa — Reala (igandea, 7, 12:00)
Gizonezkoen liga, 15. jardunaldia
- Donostiako Atletiko — Club de Campo (igandea, 7, 12:30)
Saskibaloia
Emakumezkoen liga, 28. jardunaldia
- Ibaeta Basket — Gernika (ostirala, 5, 19:00)
Gizonezkoen bigarren mailako liga, 28. jardunaldia
- Cantabria — Gipuzkoa Basket (larunbata, 6, 19:00)
