Osakidetzak lehiaketara atera du Donostiako ospitalearen handitze lanen lehen fasea
Donostia Ospitalearen handitzearen simulazioa.Osakidetza 
Osakidetzak lehiaketara atera du Donostialdeko ESIaren kanpo kontsultetarako eraikin berriaren euste eta hondeatze lanen lizitazioa, hogei milioi euroko lizitazio aurrekontuarekin. Gaur egun, abian dira behin-behineko aparkalekuaren obrak. Aparkaleku horrek aukera emango du egungo aparkalekuko lursailak libre uzteko eta, hala, protoiterapia eta kanpo kontsultetarako eraikinak eraikitzeko. Aurreikusten da Protoiterapia Unitatearen obrei udan hasiera ematea eta kanpo kontsultetarako eraikin berriaren eraikuntzari urtea amaitu aurretik hasiera ematea.
Osakidetzak 78 milioi euro aurreikusi ditu kanpo kontsulten eraikinerako. Donostia Unibertsitate Ospitalean kokatuko da eta 48.000 metro koadroko azalera eraikia izango du. Eraikuntzak bost solairu izango ditu sestra gainean, eta, batez ere, kontsulta eremurako (250 eremu berri baino gehiago pazienteen diagnostikorako eta tratamendurako) eta eguneko ospitale berrirako izango dira. Horrez gain, lau solairu izango ditu sestra azpian. Horietako hiru aparkalekurako izango dira (560 plaza), eta lehenengo soto solairua banatuko da erradiologia eremu baten eta ospitale osorako espazio logistiko handi baten artean.
Eraikina sotoetako barne galeria baten bidez egongo da Protoiterapia Unitatearekin konektatuta, baita Donostia Ospitaleko gainerako eraikinekin ere. Bestalde, aireko konexio galeria baten bidez, posible izango da Donostia Ospitaleko eraikinen arteko langileen konexioa.
Donostia Ospitalearen handitzearen simulazioa.Osakidetza
