Dbusek taxibus zerbitzu bat jarriko du martxan, Atotxarrekarako eta Itsasargi pasealekurako
Atotxarrekako eta Itsasargiaren pasealekuko bizilagunentzat eskaripeko Taxibus zerbitzu berri bat abian jartzea erabaki du Dbus konpainiak, Atotxarrekako 47 linea ordezkatzeko eta Igeldoko Itsasargi pasealekura iristeko. Orain arte eskuragarri zeuden ibilgailuekin, itsasargira igotzen den pasealekura sartzeko zailtasunak zituzten, eta Dbusen lineak ez ziren zona horretaraino iristen, nahiz eta bizilagunek asko eskatzen zuten zerbitzua izan.
Horrela, taxibus zerbitzua egunero egongo da funtzionamenduan, jaiegunetan barne, 60 minutuko maiztasunarekin. Eskaripeko zerbitzua izango denez, erabiltzaileek gutxienez 30 minutuko aurrerapenarekin egin beharko dute eskaera, webgune bidez edo telefonoz. Zerbitzuak Atotxarrekako eta Itsasargi pasealekuko zonak Antiguarekin eta Dbusen gainontzeko lineekin lotuko ditu, eta, Atotxarrekaren kasuan, Añorgarekin eta Añorga Txikiren hobeto lotuta egongo da, baita ere. Zerbitzuak urtean 30.000 erabiltzaile izatea aurreikusten du Dbusek.
Ordaintzeko, Mugi txartela erabiltzen dutenek doako autobus aldaketak egin ahal izango dituzte Dbusen linea guztietan. Mugi txartelik ez dutenek, aldiz, Dbusen sarean onartutako gainerako tituluekin ordaindu ahal izango dute: noizbehinkako txartelarekin, Bat eta Barik txartelekin eta QR edo EMV digital bidez.
47 linearen ordez
Atotxarrekako 47 linea ordezkatuko du taxibus zerbitzuak. Auzune horretako bizilagunek eskatuta, 47 linea proba gisa abian jarri zuen Donostiako autobus konpainiak, baina erabilera datuak ez dira onak izan: bederatzi hilabeteko funtzionamenduaren ondoren, linea honen erabilera Dbusen gainerako mikrobusen lineena baino askoz txikiagoa izan da: lanegunetan, batez beste, 110 erabiltzaile izan ditu lineak egunean, Dbusen beste mikrobus lineen batez bestekoa, aldiz, egunean 420 bidaiarikoa izan da.
Atotxarrekako bizilagunen eskariei erantzutez, Dbusek azaldu duenez, linearen ibilbidea egokitu egingo da, eta orain arte izan den ibilbide zirkularra izan beharrean, bi norabidekoa izango da. Horrela, lotura zuzena izango da Atotxarreka eta Antigua artean, baita Atotxarreka eta Añorgaren artean ere. Hori lortzeko, lau geltoki berri gehituko dira Atotxarrekan Añorgarako noranzkoan. Gainera, Atotxarreka-Añorga ibilbidean Añorga Txikin geldialdia egingo du, erabiltzaileek auzorako sarbide zuzena izateko.
