Donostia Kulturak 24 ikuskizuneko programa aurkeztu du udarako
Tentazioa konpainiaren 'Ez naiz inoiz Dublinen egon' antzezlana. 
Udako arte eszenikoetako ordainpeko programazioa aurkeztu du Donostia Kulturak. Guztira, 24 ikuskizun izango dira uztailetik irailera Donostia Kulturaren antzoki eta kultur etxeetan: lau kontzertu, hemezortzi antzezlan, dantza emanaldi bat eta haur ikuskizun bat. Bestalde, udazkenean izango diren hiru ikuskizunen berri eman dute.
Sarrerak bihar jarriko dituzte salgai 11:30etik aurrera Victoria Eugenia antzokiko eta Antzoki Zaharreko leihatiletan, eta donostiakultura.eus/sarrerak webgunean.
Antzezlanei dagokienez, hainbat dira aipagarriak: Tentazioa konpainiaren Ez naiz inoiz Dublinen egon (Antzoki Zaharra, uztailak 11-14), Las que gritan (Antzoki Zaharra, uztailak 18-21) Alberto San Juanen Macho grita (Antzoki Zaharra, abuztuak 05-11), The Divas Xperience konpainiaren ¡Jenniffer López, Beyoncé, Rihanna, Lady Gaga y muchas más! (Victoria Eugenia, abuztuak 07-11), Oscarra Oscarrentzat (Antzoki Zaharra, abuztuak 15-18), Oscar Terolen ¡Ay Dios! (Antzoki Zaharra, abuztuak 19-25), ; Iker Galartza eta Zuhaitz Gurrutxagaren Almazenean (Antzoki Zaharra, abuztuak 26-28), eta Ramon Agirre, Joseba Apaolaza eta Asier Hormazaren Artea (Antzoki Zaharra, irailak 12-15).
Musika eskaintza, berriz, askotarikoa izango da: III. Nazioarteko Opera eta Zarzuela Lehiaketaren finala (Victoria Eugenia, uztailak 13), Jethro Tull’s Martin Barre (Victoria Eugenia, uztailak 14) eta Euskal Herriko Gazte Orkestra (Victoria Eugenia, uztailak 20), besteak beste.
Dantza ikuskizun bat ere programatu dute, Miarritzeko Malandain balletaren Mosaikoa (Victoria Eugenia, abuztuak 1-4). Haurrentzat, berriz, Cia Roi Borrallasen Solo ikuskizuna ekarriko dute (Gazteszena, Egia, irailak 5-6).
Udazkenak dakarrena
Donostia Kulturak udazkeneko programazioaren aurrerapena ere egin du. Hain zuzen ere, Viktoria Eugenia antzokian egingo diren hiru kontzertu iragarri dituzte: Ismael Serrano: La canción de nuestra vida (urriak 10) Dorian (azaroak 7) eta Doctor Deseo: Suavementeme mata con su canción (abenduak 15). Sarrera salmenta maiatzaren 30ean aktibatuko dute, 11:30ean.
