Node konpainiak 'Me arrepiento' ikuskizuna eskainiko du larunbatean Gazteszenan
Ikuskizunaren afixa. Donostia Kultura 
Node taldeak Me arrepiento ikuskizuna eskainiko du larunbatean, Egiako Gazteszenan. Ion Estala dantza konpainiaren zuzendariak sortu du ikuskizuna, eta Yosu Yeregui interpreteak eta Rev Silver musikari madrildarrak parte hartuko dute, 19:30ean eskainiko duten saioan.
Obra komedia arin bizi bat da, dantza, performatibitatea eta zuzeneko musika uztartzen dituena. Node 2016an Donostian sortutako dantza, performance eta ikus entzunezko konpainia bat da. Ana Barrantesek (ekoizpena eta banaketa) eta Ion Estalak (sortzailea eta zuzendaria) osatzen dute.
Dantzaren sustapenaren bila
Lana Errenteriako Dantzagunea sorkuntza zentroan egin dute. Gipuzkoako Foru Aldundiko Kultura Departamentuak bultzatu du zerbitzua, dantzaren sorkuntza eta prestakuntza sustatzeko eta laguntzeko. Prentsa ohar baten bidez, Goizane Alvarez Kultura, Lankidetza, Gazteria eta Kirol diputatuak “Dantzaguneak Gipuzkoan dantzaren sustapenean eta garapenean duen eragin positiboa” nabarmendu du. Era berean, Me arrepiento lana “sorkuntza zentro horrek emandako babesaren eta baliabideen isla” dela nabarmendu du diputatuak, Gipuzkoan sortu eta garatzen diren kultur ekimenak babesten baitira bertan, Alvarezen arabera.
