Toxicowatch eta Biogipuzkoa ez datoz bat erraustegiaren eraginaren inguruan
Herbehereetako fundazioak 2019an baino toxiko gehiago aurkitu ditu. Azken bost urteotan egindako azterlanaren emaitzak aurkeztu dituzte.
![Toxicowatch_Hernani](https://irutxulo.hitza.eus/site/files/2024/05/toxicowatch_hernani.jpg)
Zubietako erraustegiak eragindako kutsadurari buruzko azterlanaren emaitzak aurkezteko lehen agerraldia egin zuen atzo Toxicowatch fundazioak, Hernanin. Berria egunkariak emaitzen xehetasunak jaso zituen, eta adierazgarriak dira.
2019an hasi ziren erraustegiaren toxikotasuna neurtzen azpiegituraren inguruan. Ordutik hona, urtero aritu dira inguruko oiloen arrautzetan, hainbat motatako zuhaitzetan, sedimentuetan, uretan eta amen esnean laginak hartzen, eta ondorioztatu dute erraustegia martxan jarri zenetik nabarmen handitu dela hainbat toxikoren proportzioa lagin horietan. Erakunde independente horretako bi buruek —Abel Arkenbout eta Kirsten Bouman— eman zituzten emaitzak: Arkenbouten arabera, arrautzetan eta hainbat landaretan “dioxina kantitate handia” topatu dute 2022an eta 2023an, 2019. urtearekin alderatuta.
Hain zuzen ere, Toxicowatchen emaitzak oso ezberdinak dira Biogipuzkoak egindako ikerketarenekin alderatuta —Osakidetzaren menpekoa da erakunde hori—; duela bi aste adierazi zuten ikerketa horren arabera ez dutela ikusi epe motzeko eraginik osasunari dagokionez.
Herbehereetako bi zientzialariek ondorioztatu dute Zubietako erraustegia piztu zenetik handitu egin dela hainbat gai kutsatzaileren presentzia, baina gaineratu dute gutxienez 2025era arte jarraituko dutela ikertzen. Izan ere, Zero Waste Europe sareak zazpi erraustegi ikertuko ditu zer-nolako eragina duten jakiteko, eta tartean da Zubietako erraustegia; Madrilgoa, Pariskoa, Belgikako bat, Txekiako bat, Lituaniako bat eta Herbehereetako bat ere ikertuko dituzte.