Abegi Etxearen eranskin berrituaren ateak irekiko dituzte
Abegi Etxea.Donostiako Udala 
Donostiako Udalak datorren astelehenean, ekainaren 3an, irekiko ditu Abegi Etxearen eranskin berrituaren ateak, eta aukera emango die instalazio horiek erabili behar dituzten familia osoei aldi baterako harreran beren bizitza garatzeko, eremurik intimoena familia nukleoa osatzen ez duten pertsonekin partekatu gabe.
Joan den urtean hasitako berritzearen ondoren, eraikina hiru logela independente —horietako bat egokitua— izatera pasatu da. Logela bakoitzak bainugela eta gosaltzeko oinarrizko tresneria duen sukalde txiki bat du, eta garbitegi gune bat partekatuko dute. Logela bakoitzak, gainera, sarrera propioa du atzeko fatxadatik. Horrez gain, egonaldi gune propioa du eraikinak, eta haurrentzako jolas gune bat jarriko dute.
Jarduera honen aurrekontua 297.053 eurokoa izan da, eta horietatik 174.473 euro Gipuzkoako Foru Aldundiko Zainketarako eta Gizarte Politiketako Departamentuak diruz lagundu ditu.
