Legegintzaldiaren azken zatian birgaituko dute Loiolako biaduktuen ekialdeko muturra
Gipuzkoako Foru Aldundiak 26,4 milioi euro inbertituko ditu legegintzaldi honetan (2023-2027) lurraldeko errepide sareko zubiak eta biaduktuak indartzeko lanetan. Lan horien artean, Loiolako GI-20 errepideko biaduktuen ekialdeko muturra dago.
Hain zuzen ere, esku-hartze handiena Loiolako biaduktuen ekialdeko muturraren birgaitze integrala izango da. Horretarako 18,9 milioi euroko inbertsioa aurreikusten dute, eta pantaila akustikoen linealak ere instalatuko dituzte. Maria Ubarretxena Gipuzkoako Bide Azpiegituretako diputatuak azaldu duenez, “obra konplexua izango da, bai teknikoki, bai ekonomikoki”.
Hori dela eta, proiektuari legegintzaldiaren azken zatian heltzea aurreikusten da, Ubarretxenak aurreratu duenez. Diputatuak argitu du, halaber, Urumea ibaiaren gaineko bidezubian amaitu berri den zurkaitz jarduerarekiko independentea dela proiektua, eta honen birgaitze integrala egiteko beste proiektu bat beharko dela, une honetan lantzen ari direna.
Aldundiak zubibide osoa hobetzeko proiektu integral bat jarri zuen martxan duela bi urte. Zubi hori duela 50 urte eraikitako taula batzuek osatzen dute, eta eguneraketa beharrean zeudela azaldu zuten arduradunek. Euste lanak iazko abuztuaren 1ean hasi ziren, eta 4,8 milioi euroko aurrekontua izan dute. Horri esker, egitura metalikoen bidez eutsi zaio biaduktuaren ibaiaren gaineko tarteari, bi galtzadetan.
