Batzar nagusiek Federico Garcia Lorcako bizilagunen agerraldia babestu dute
Gipuzkoako Batzar Nagusietako talde politikoek EH Bilduren eskaera babestu dute, autobus geltokiak inguruan sortzen dituen eragozpenak ezagutzeko.
Federico Garcia Lorcako Lurraldebusen autobus geltokia. 
Gipuzkoako Batzar Nagusietan ordezkaritza duten alderdi politikoek, PSE- EEk salbu, Mugikortasun Batzordearen lehendakaritzara jo dute, Urumeako Auzo Elkarteko ordezkarien agerraldia antolatu dezaten eskatzeko. Eskaera gaur bertan aurkeztu dute, Federico García Lorca kaleko bizilagunek 2. zenbakian dagoen autobus geltokiaren erabilerak sortutako ezinegona azaldu dezaten.
Eskaera hori bultzatu duten alderdiek azaldu dutenez, aipatutako geltokia bizilagunen ataritik metro gutxira dago, eta jende andana pilatzen da inguruan, Lurraldebus eta atzerriko autobus turistikoen zain. Bizilagunek salatu dutenez, halaber, autobusak denbora luze geratzene dira inguruan “motorrak piztuta” dituztela, eta kutsadura akustikoaz gain, eta ingurumenekoak arazoak sortzen dituzte, euren leihoetatik oso gertu baitaude.
Hala, eskaera bultzatu duten alderdien aburuz, “beharrezkoa da inplikatutako pertsonen ordezkariei entzutea, egoera, ikuspuntua eta ezinegona ezagutzeko”.
Era berean, afera horrek udalaren eta aldundiaren mugikortasun sailen artean sorturiko ika-mika dela eta, EH Bildu taldeak Olatz Yarza Donostiako Udaleko Mugikortasun zinegotziari ere agerraldia egiteko gonbita luzatu dio. Koalizio abertzalearen iritziz, garrantzitsua da Yarzak agerraldia egitea “itxuraz kontraesankorrak diren iritziei buruzko azalpenak eman ditzan”.
