Eneko Goiak aitortu du «kezkagarria» dela Donostiako etxebizitzen prezioa
Eneko Goia atzoko prentsaurrekoan.Donostiako Udala 
Gipuzkoako Higiezinen Jabetzako Agenteen Elkargo Ofizialak argitaratu dituen datuen arabera, alokairuko etxeen eskaintza gero eta murritzagoa da, eta ondorioz, prezioek gora egin dute. Horren aurrean, Eneko Goiak “kezkatuta” dagoela adierazi zuen Tokiko Gobernu Batzordearen ondorengo prentsaurrekoan.
“Nik uste dut etxebizitzaren eskaintzarekin gertatzen ari dena fenomeno orokor bat dela, eta horrek dudarik gabe kezkatu egiten gaitu”, nabarmendu zuen alkateak. Goiaren arabera, udalaren borondatea da gai honetan dauzkan ahalmen guztiak erabili ahal izatea.
Horrez gain, Donostiako Udalak babes ofizialeko etxebizitzak sustatze aldera egiten duen “esfortzua” erakusteko hainbat datu eman zituen. Gaur egun, udalak duen zorraren bi herenak etxebizitzak egiteko erabilitako zorra direla azaldu zuen, eta era berean, Loiolako Kuartelak erosteko zorpetzea ere erabaki dutela nabarmendu zuen, 59,7 milioi eurotan. “Horren helburua, hain zuzen ere, etxebizitza sustatzea da. Beraz, hor ikusten da udalak zein esfortzu egiten duen aspalditik, ez soilik azken legealdietan”, esan zuen.
Alkatearen arabera, ez dago Donostian bezainbeste zor duen inguruko beste udalerririk biztanle kopuruaren arabera konparatzen bada. “Horrela jarraitu beharko dugu, eta hurrengo urteetan ere, konpromiso horiekin aurrera egitea izango litzateke Igaran, Illarran, Infernuan, Kanpandegian eta dotazionaletan. Aurrekontuetan jasota dauzkagu zeintzuk diren gure inbertsio asmoak”, nabarmendu zuen.
Donostiako metro koadroaren prezioa 5.496 eurokoa da, nahiz eta Erdialdea, Gros, Aiete edo Antigua bezalako auzoek zifra horiek nabarmen gainditzen dituzten.
