Lau hilabetez atzeratuko dute Kontxako baranda zaharreko zatien zozketa
Kontxako barandaren zati batekin amesten zutenek, denbora batez itxaron beharko dute, beste behin, zoriak zatiren bat esleitzen dien ala ez jakiteko. Hala adierazi du Carlos Garcia Mantentze zinegotziak. Garciaren arabera, gutxienez lau hilabetez itxaron beharko dute donostiarrek, duela bi urte erretiratutako Kontxako barandaren zati zaharren zozketan parte hartzeko. Zinegotziak azaldu duenez, baranda zatitzeko kontratatutako enpresak “uko egin dio” zatitzeari, eta lan hori berriro lehiaketara atera beharko delako.
Hirugarren lizitazioa izango da. Joan den neguan antolatutako bigarren lizitazioan, lau enpresa aurkeztu ziren kontratua eskuratzeko. Puntu gehien lortu zituen enpresak Barbateko (Cadiz) Juan Jose Pacheco Revueltarena izan zen. Barandak 39.000 eurogatik —gehi BEZa, 47.190 euro guztira— zatitzeko konpromisoa hartu zuen. Prezio horren truke, enpresak bere gain hartu behar zituen materialaren garraioa, zatitzeko lana gehienez zortzi asteko epean, eta unitateak udal biltegian entregatzea.
Bada, kontratuaren esleipendunak berriki jakinarazi dio udalari kontratuari «uko» egiten diola. Gauzak horrela, hirugarren lizitazio bat izapidetzen hasi beharko da administrazioa. Garciak uste du bigarren lizitazioan aurkeztutako hiru enpresakoren batek interesa izango duela berriz ere parte hartzeko. Ezbehar horrek, baina, gutxienez lau hilabetez atzeratuko du 190 baranda unitateen zozketa.