EHUk ez du akordio berririk egingo CAF enpresarekin
Agustin Erkizia errektoreordeak iragarri duenez, EHUk ez du CAFekin akordio berririk sinatuko, Jerusalemgo tren arinaren proiektuan jarraitzen duen bitartean.
Ibaetako errektoreordetzan egindako elkarretaratzea.Olatz Balda 
Gaur ziren sinatzekoak EHUko Ibaetako gobernu batzordearen eta CAF enpresaren akordio berria, CAFek Bilboko ingeniaritza eskolan duen antzeko akordio bat lortu nahi zuelako Gipuzkoako Ingeniaritza eskolarekin ere. Berri horren aurrean, BDZ Kanpaina Gipuzkoa (Boikot, Desinbertsio eta Zigor) eta EHU Palestina taldeetako 30 lagunek elkarretaratze bat egin dute, 8:45ean errektoreordetzaren atarian, akordio horren aurkakotasuna aldarrikatzeko. Bilera hori amaituta, baina, bi taldeetako hainbat kide Agustin Erkizia Errektoreordearekin elkartu dira, eta Erkiziak berak jakinarazi die Jerusalemgo proiektuarekin jarraitzen duten bitartean, EHUk ez duela CAF enpresarekin akordiorik sinatuko.
Kideek baieztatu dutenez, tren horren proiektuak palestinar herriak “pairatzen duen zapalkuntza kolonial eta apartheid sistema” sendotzen du. Izan ere, estatu sionistako herritarrak baterik bestera garraiatzen dituzte, eta “kolonia ilegalak” sendotzen dituzte, palestinar herritarrak azpiratzen dituzten bitartean.
Agustin Erkizia, BDZ eta EHU Palestina taldeetako hainbat kiderekin hizketan.Olatz Balda
Gauzak horrela, ulertezina egiten zitzaien EHUk halako jarduerak hauspotzen dituen enpresa batekin harremanak izatea. Are gehiago,
EHUk apirilaren 24an gehiengoz onartutako mozioan, uko egiten ziolako formalki nazioarteko zuzenbidea edo Nazio Batuek Palestinako egoerari buruzko ebazpenak errespetatzen ez dituzten eragileekin hartu-emana izateari. Hala, “pauso logikoa” da, taldeen arabera, CAFekin akordiorik ez sinatu izana.
BDZ elkarteko kideek albiste positibotzat jo dute errektoreordetzaren erabakia, eta txalotu egin dute Ibaetako campuseko ordezkariek hartu duten jarrera: “EHUk, Boikot Desinbertsio eta Zigor kanpainaren zein bertako ikasle eta langile andanaren mezua jaso eta kolaborazio hau etetea erabaki duelako”.
Nolanahi ere, bajakin badakite bidea ez dela hor amaitzen, eta EHUko Errektoreordetzari Bizkaiko ingeniaritza eskolak CAFekin duen ituna “bertan behera uzteko” exijitu diote, baita EHUk AXA zein HP enpresa kolaboratzaileekin dituen harremanak eteteko ere: “Genozidioa urrun gertatzen da, baina gutxiengo etiketa ariketa da genozidioarekin ez kolaboratzea”.
Hona hemen elkarretaratzeko hainbat irudi:
