Udalak 58 etxebizitza babestu eta 50 garaje gorde beharko ditu Loiolako militarrentzat
Salerosketa akordioaren arabera, familia horiek eskubidea izango dute "hirigintza plan berria garatzean etxebizitza berri bat izateko, eta, ahal dela, guztien etxebizitza eraikin berean".
Ezkerrean, Gonzalez Valles Generala izeneko egoitza militarra; eskuinean, berriz, Loiolako kuarteletako etxebizitzen bi blokeak. Olatz Balda 
Donostiako Udalaren eta Espainiako Defentsa Ministerioaren arteko akordioaren arabera, Loiolako kuartelak eta beste lursail batzuk salerosteko, alokairu sozialeko 58 etxebizitza gorde beharko dira atzeko aldean dauden etxebizitza blokeetan bizi diren familientzat; Ametzagainako parkera eta Ubako aterpetxera doan errepidera ematen duten etxebizitza blokeetan bizi direnentzat, alegia. Militarrak eta haien senideak bizi dira eraikin horietan.
Naiz atariak abenduaren 18an Madrilen sinatutako salerosketa akordioa eskuratu du, eta bertan jasotzen denez, bloke horietan 78 etxebizitza eta bi merkataritza lokal daude, baina sinatzeko unean 58 baino ez zeuden okupatuta, eta bertako bizilagunak dira udalak birkokatu beharko dituenak.
Agirian jasotzen dena aintzat hartuz, familia horiek eskubidea izango dute “hirigintza plan berria garatzean etxebizitza berri bat izateko, eta, ahal dela, guztien etxebizitza eraikin berean”. Bitartean, egungo etxebizitzetan jarraituko dute. Hirigintza planak 1.500 eta 1.700 etxebizitza artean aurreikusten ditu: horietatik %60 merkatu librekoak izango dira eta %40 babes publikokoak, erdia tasatua eta beste erdia soziala. Naiz-ek 1.500 etxebizitzaren gaineko kalkulu bat egin du. Etxebizitza sozialak %20 izango lirateke —300 etxebizitza–, eta horien artetik batzuk –58 printzipioz– militarrentzat.
Egoitza militarrak bertan jarraituko du
Gonzalez Valles Generala izeneko egoitza militarrak, Txomiñeneko zubia zeharkatu bezain laster sarbidea duenak, Defentsa Ministerioaren esku jarraituko du. Espazio horretan daude, batez ere, Loiolako agintariak eta zerbitzu eginkizunetan dauden militarrak, Donostian zeregin puntualen bat egiten ari direnak. Naiz-en arabera, erabiltzaile horientzat, udalak konpromisoa hartu du “turismoentzako 50 garaje plaza jabetzan emateko, langileek bakarrik erabil ditzaten”. 1.084.207 euroko balioa dute aparkaleku horiek.
Urbanizatu ezin diren eremuak
Oro har Loiolako kuartelak aipatzen badira ere, eragiketa hainbat gune eta fasetan banatzen da. Kuartelek hartzen duten 17,5 hektareako eremuaz gain, Uliako sei hektareako eremu bat ere udalaren eskuetara pasatuko da, baina dena ezin da urbanizatu. Hain zuzen ere, 142.000 metro koadro bideratuko dituzte bizitegi erabilerara, eta 8.000 erabilera tertziariora, alkateak akordioa adostu zutenean esan zuenez. Monte Redondo, Punta Atalaya Bis, Fuerte Almirante eta Faro de Plata gisa identifikatuta daude Uliako espazio horiek.
Gogoratu behar da udalak eta Espainiako Defentsa Ministerioak 2022ko azaroan adostu zutela kuartelen salerosketa akordioa eta handik urtebetera itxi zutela salerosketa, 73,3 milioi euroren truk; bost milioi ordaindu dituzte dagoeneko, 65 milioi eskriturak sinatzean ordaindu beharko dituzte eta beste hiru milioi operazioa bukatzean.
