Udalak 250.000 euro bideratuko ditu tokiko merkataritzara
Donostiako Udalak 250.470 euro bideratuko ditu aurten San Sebastian Shops merkataritza plataformarekin urtero sinatzen duen lankidetza hitzarmenera. Plataforma horrek hiriko merkatarien elkarteak biltzen ditu.
Ane Oiarbide Ekonomia eta Tokiko Enplegu zinegotziak gogorarazi duenez, “Donostiako merkataritza hiriko enpleguaren %9 da, 8.500 lanpostu baino gehiagorekin. Sektore honek zerbitzu garrantzitsua ematen die Donostiari eta Gipuzkoari 2.418 establezimendutan, hau da, lurraldeko merkataritza osoaren %30ean”.
Sare sozialetan eta beste euskarri batzuetan bideoekin lagundutako kanpainak egingo dira tokiko merkataritza donostiarrari balioa emateko, “Donostia helmuga komertzialen lehen lerroan egon dadin saiatuz”, eta helburu hori donostiarrei eta bisitariei helaraziz, uda garaian batez ere.
Egitasmoak
Zinegotziak azaldu duenez, ekimenetako batek 3Dko pertsonaia bat du, Shoppy izenekoa. Donostia bisitatzen du bere espazio ontzian, eta, azkenean, esperientzia paregabea bizitzen du, “hiriak eta saltokien kalitateak liluratuta”.
“Donostiak produktuaren eta bertako marken alde egiten duten lehen mailako saltokiak ditu. Harrera egiten, arreta pertsonalizatua ematen eta garai berrietara egokitzen dakien merkataritza, baina nortasun kultural propioa mantenduz. Gure hiriaren enbaxadore bihurtzen dira, eta Donostia helmuga turistiko paregabea bihurtzen dute”, adierazi du Oiarbidek.
Hitzarmenak jasotzen duen beste ekimenetako bat Parte Zaharreko merkataritza historikoa indartzea da, biniloak jarriz lokaletako erakusleiho eta fatxada komertzialetan, hiriaren historia eta merkataritzaren lotura kontatzeko. Horrela, Alde Zaharreko fatxada komertzialak hobetuko dira, eta auzoko merkataritzaren erakargarritasuna sustatuko da.
Zazpi merkataritza ibilbide ere sortuko dituzte auzoetan. Google Maps plataforman sartuko dira, eta saltokiei buruzko informazioa jasoko da, irudiekin eta aplikazioan duten kokapenarekin.
Bestalde, Donostiako merkataritzaren erakargarritasuna hobetzeko, ekainaren 29an, larunbata, Arcco Merkataritza Zentroan “oilarren” lehiaketa bat egongo da, errimen borroka bat, herriko saltokiak ardatz hartuta.
Ekinn Dendak deialdi berria
Ekinn Dendak deialdi berri bat ireki du, hiriko merkataritza eta zerbitzu eskaintza indartu eta osatuko duten proiektu ekintzaile berriak identifikatu eta babesteko.
2022ko barometroaren datuen arabera, merkataritzari lotutako jarduera ekonomikoa tokiko produkzio sarearen %13,5 da, hiriko enpleguaren %8,9 eta hiriko BPGaren %5,6. 2023an, Donostiak txikizkako 2418 saltoki zituen, hau da, 1.000 donostiarreko hamahiru saltoki, eta EAEko hiru hiriburuen buruan zegoen.
