Isuri Gutxiko Eremua arautuko duen ordenantza bihar aurkeztuko du udalak osoko bilkuran
Olatz Yarza Mugikortasun zinegotzia eta Juantxo Marrero Ekologiako zinegotzia, Mugikortasun Planaren eta Isuri Gutxiko Eremuaren berri emateko prentsaurrekoan.Donostiako Udala 
Isuri Gutxiko Eremua (IGE) arautuko duen ordenantza bihar aurkeztuko da Osoko Bilkuraren hasierako onespenerako. Dokumentua aurrera aterako da, maiatzean iragarritakoa aldatu gabe. Orduan jakinarazi zituen udalak eremu mugatuaren mugaketa geografikoa eta aplikazio fase bakoitzean eragindako ibilgailuak zeintzuk izango diren.
IGEk Parte Zaharra, kaia eta Erdialde osoa hartzen ditu bere gain, eta urte amaieran edo 2025eko hasieran sartuko da indarrean, udalaren aurreikuspenen arabera. Lehenengo hiru urteetan, ingurumen bereizgarririk ez duten ibilgailu motordunek ezingo dute eremu horretan sartu —egoiliarrak eta bestelako salbuespen batzuk izan ezik—, eta B bereizgarria dutenak ere ezingo dira sartu 2028tik aurrera.
IGEko sarbideak kontrolatzeko, hamar bideokamera jarriko dituzte, puntu hauetan: Zurriolako zubian, Santa Katalina zubian, Gernikako Arbola pasealekuaren eta San Martin kalearen arteko bidegurutzean, Gernikako Arbola pasealekuaren eta Valentin Olano kalearen arteko bidegurutzean, Araba parkearen eta Easo kalearen arteko bidegurutzean, Autonomia kaleko biribilgunean, San Rokeren eta Belizalderen arteko bidegurutzean, San Rokeren eta Belokaren arteko bidegurutzean, Aldapetaren eta La Feren arteko bidegurutzean eta Mirakontxa pasealekuan, Almudena etxearen inguruan.
Araudia indarrean sartu eta berehala, udalak ahalmena izango du IGEn baimenik gabe sartzen diren ibilgailuak zigortzeko. Hain zuzen ere, 200 euroko isunak jarriko dituzte, eta araua behin baino gehiagotan urratzen dutenei isuna %30 igoko diete. Horrela, lehenengo fasea amaitzerako, IGEn egunero 7.500 ibilgailu motordun gutxiago ibiltzea aurreikusten du udalak, eta 2030erako 12.000 gutxiago.
