‘Formaren arazoa’ erakusketa, Arteko galerian ikusgai
Jaime de los Rios artista donostiarraren azken lana da.
'Formaren arazoa' erakusketa, Arteko galerian ikusgai.Arteko galeria 
Jaime de los Rios (Donostia, 1982) artista elektronikoak Formaren arazoa erakusketa aurkeztu du Arteko galerian. Azaldu duenez, “adierazpen piktorikoaren eta sorkuntza digitalaren arteko espazio liminalean oinarritutako proiektua da”, eta teknologia berriak eta algoritmoak paperezko obrarekin elkarrizketan jartzen ditu.
Artistak sorkuntza digitalaren sofistikazioa erakutsi nahi izan du bere azken lanen bidez. Azken honekin, geometriaren oinarrizko elementuak erabiltzen ditu unibertso matematiko eta poetiko bat eraikitzeko; hala, problema matematikoei, besteak beste, enuntziatua eta osagaien identifikazioa kendu, eta arazotik askatzen ditu, zimurtuz eta hegaldaraziz.
Proiektu honetan, etxean egindako robot batekin egiten du lan. Robot horri boligrafo bat ematen dio margotzeko, eta haur bat bezala hezten du. Bestalde, desautomatizatzen saiatzen den makina txiki horretara pasatzen du bere trazu propioa. Hala, artearen historiako beste sortzaile batzuen bidea gurutzatzen du artistak, ohi duen moduan: Twomblyren pinturaren deseraikuntza edo Elena Asins matematikariarekin izandako elkarrizketa, esaterako. Horrekin guztiarekin, artistak arrazoiari eta poesiari buruzko bidaia autobiografiko batera gonbidatzen du ikuslea.
De los Riosen lanak natura aztertzen hasi dira, elementu biologikoak ez ezik, migrazio mugimenduak, datu fluxuak, Big Data edo Adimen Kolektiboa ere barneratuz. Prozesu horien matematika aztertuz, sistema estetikoetara eramaten du, eta erritmo eta denbora intuitiboak dituzten lan unibertsalak sortzen ditu artistak. Beren algoritmo konputazionalak programazio lengoaiaren bidez aktibatzen dira, LED fatxada handietan edo pantailetan, edo elektrizitaterik behar ez duten eta espazio publikoan elkarrekin bizi diren ekuazioetan. Horietako batzuk, gaur egun, Kutxa Fundazioarenak dira, besteak beste.
