Agitiko hondartzan dago, besteak beste, botiletan tapoia lotuta egotearen arrazoia
Botilen tapoiek itsasoan sortzen duten kutsadura estatuko hainbat hondartzatan aztertu dute, tartean, Igeldon.
![Agiti](https://irutxulo.hitza.eus/site/files/2022/11/agiti.jpg)
Gaur sartuko da indarrean 7/2022 Legea, eta botilen eta briken plastikozko tapoiak lotuta egongo dira aurrerantzean, legez. Kontsumitzaile askok uste dute traba bat besterik ez dela, baina handia da tapoiek hondartzetan, bereziki, uzten duten hondakinen arazoa.
Datu itxi bat da zaborrak itsasoa kutsatzen duela, eta hori hondartzetan nabaritzen dela; izan ere, horietan aurkitutako hondakinen %74 plastikoak dira, eta, plastikoen artean, tapoiak dira buruhausterik handienetako bat. Ohikoena da tapoi horiek polietileno tereftalatoz (PET), dentsitate handiko polietilenoz (PEAD) eta polipropilenoz (PP) eginda egotea. Material horiek guztiak birzikla daitezke, baina, tapoia botilari lotuta ez badago, baliteke sailkapen baheetan galtzea eta zabortegian amaitzea, birziklatu gabe.
Espainiako Ingurumen Ministerioak tapoien arazoa aztertu zuen kostalde guztietan, 2022ko hondartzetako itsas zaborrei buruzko txostenean, eta Euskal Herriko bi hondartza sartu zituen: Agitikoa (Igeldon) eta Meñakozekoa (Barrikan, Bizkaian). Agitiko harrien artean urte horretan aurkitutako zabor guztietatik, %74,8 elementu plastikoak izan ziren. Plastikozko bonbillak eta botilak izan ziren zaborrik ohikoenak, aurkitutako guztiaren %14,9. Hala, galdutako tapoiek 12. postua hartu zuten taula horretan (janari poltsaen eta laten moduko elementuen azpitik).
Ikasleei proba
Madrilgo Unibertsitate Politeknikoko ikertzaile Jose Vicente Lopezen The Conversation artikuluak emaitza anbiguoak eman zituen: aipatutako unibertsitateko 98 ikasleri egin zitzaien proba eta, hasiera batean, ikasleen %78ari zuzena iruditzen zitzaion tapoia botilari lotuta egotea. Horien aldean, %15ak uste zuen berrikuntza ez zela zuzena, eta %7ari berdin zion.
Aldaketaren alde agertu zen %78ak aitortu zuen, azkenean, erabat kentzen zuela tapoia, edatea erosoagoa izan zedin. Beraz, aldaketaren baliagarritasuna, berriz ere, kontsumitzaileak ohitzeko duen gaitasunean eta, batez ere, kontzientziazio mailan definituko da.