Cementos Rezola enpresak 56 lanpostu gutxiago izango ditu, behin betiko
Cementos Rezolako langileak, hilabete hauetan egindako manifestazioetako batean.Nagore Garmendia 
Amaitu da negoziatzeko epea, eta jakina da zein den Cementos Rezola enpresaren patua: Heidelberg Materials enpresak Cementos Rezolan 56 lanpostu kenduko dituela jakinarazi die sindikatuei, eta, beraz, langileriaren erdiak soilik jarraituko du enpresan. Hala ere, 56 lanpostu horiek ez dira denak kaleratzeak izango: bederatzi Arrigorriagara (Bizkaia) lekualdatuko dituzte eta 24k erretiro aurreratua hartuko dute, zuzendaritzak erretiro adina aurreratzea onartu ostean.
23 izango dira, guztira, kaleratuak izango diren langileak eta horietatik hemezortzi “bidegabekoak” dira; beraz, ordainaz gain, gain sari bat jasoko dute. Gainonetzeko bostak, aldiz, kaleratze arruntak izango dira, inongo akordiorik gabe emango direnak (tartean, diru gutxi jasoko dute). Abuztu amaieran kaleratuko dituzte langile horiek, eta lekualdatzeak, aldiz, irailaren 1ean emango dira.
Ekainaz geroztik, borrokan
Ekainaren 18an jakinarazi zien enpresak langileei, haietako 56 kaleratzeko asmoa zutela. Horrek sozialki izango zuen inpaktuaz ohartuta, alternatiba bat eskaini zien enpresak langile horiei: batzuk Arrigorriagara lekualdatzea (han beste fabrika bat baitaukate) eta beste batzuk, berriz, atzerriko plantetara joatea, hala nola Italiara edo Erresuma Batura. Horietako hamar, baina, zuzenean kaleratuak izango zirela ere jakinarazi zieten.
Horren aurrean, langile batzordeak borondatezko kaleratzeak negoziatzea lortu zuen, eta epe bat jarri zien enpresak, zerrenda horretan izena emateko. Hori bai, baldintza batzuekin joango ziren kalera: bidegabeko kaleratze gisa hartzea eta gain saria jasotzea, erretiro aurreratua 54 urtera jaistea onartzea eta Arrigorriagarako lekualdatzeak bermatzea. 51 pertsonek eman zuten izena zerrenda horretan, baina enpresak beste bost langile “inolako akordiorik gabe” kaleratuko zituela esan zien bart.
Langileak aste honetan bilduko dira, etorkizunean zer egin erabakitzeko; izan ere, sindikatuek ez zituzten bost kaleratze horiek espero. Ekainaren 28an hasitako grebarekin jarraitu edo ez erabakiko dute. LABek, ordea, “mobilizatzen jarraitzeko” eskatu die, behintzat, erabaki bitartean. Enpresak bere kabuz erabaki du langile horiek kaleratzea, Usua Lasa LABeko Gipuzkoako Industria arduradunaren hitzetan.
Kasua, epaitegietara
Irteera guztiak borondatezkoak izatea eskatu zuen enpresa batzordeak, besteak beste. Eskaera horiei jaramonik egin ez zitzaienez, akordiorik gabe amaitu zen EEEa, eta, horretaz gain, greba eskubidea ere zapaldu dietela salatu du ELAk.
“Langileak mehatxupean sinatzera behartu ditu, asko ez baitzeuden baldintzekin ados”, adierazi du Esther Arruti Roteta ELAko Industria eta Eraikuntzako arduradunak. Sindikatuak azpimarratu du Cementos Rezolak lanpostu horiek kentzeko aurkeztu dituen arrazoiak ez direla frogatu, eta salatu du enpresak “fede txarrez” jokatu duela negoziazioan. Horregatik, kasua epaitegietara eramango du ELAk, langileen batzarrean erabakitakoa delakoa dela.
