«Erabateko irmotasunez» gaitzetsi du udalak aste honetan Amaran izandako sexu erasoa
Aste honetan Easoko parkingean izandako sexu erasoa gaitzesteko elkarretaratzea egin dute udal ordezkariek.Donostiako Udala 
Udal ordezkariek aste honetan Amarako Easo plazako parkingean izandako sexu erasoa gaitzesteko elkarretaratzea egin dute eguerdian, Alderdi Ederren. Izan ere, Udaltzaingoak gizonezko bat atxilotu zuen atzo, ustezko sexu eraso baten egile izatea leporatuta. Emakumeak salatu duenez, erasotzaileak Easo plazako parkingean jazarri zuen asteazken gauean, eta sexu erasoa gauzatu ostean, ihes egin zuen gizonak.
Udalak jakinarazi zuenez, inguruan zebilen Udaltzaingoaren patruila bati laguntza eskatu zion emakumezkoak, eta udaltzainek erietxera eraman zuten. Biktimak emandako datuekin, Udaltzaingoak gizonezkoa identifikatu eta atxilotu zuen atzo goizean, bere etxean zegoela. Biktimak salaketa jarri zuen, eta atxilotua Udaltzaingoaren egoitzan dago.
Horren aurrean, udaleko alderdi guztietako ordezkariek adierazpen instituzional bateratua argitaratu dute, gertaturikoa salatzeko. Adierazi dutenez, udalak “erabateko irmotasunez” gaitzesten du biktimak jasandako erasoa. “Gure hirian gertatutako indarkeria matxistak eragindako beste gertaera bat izan da”, esan dute.
Bestalde, babesa eta elkartasuna adierazi diote biktimari, bai eta bere familia eta hurbileko ingurukoei ere. “Udalak indarkeria egoerak pairatzen dituzten edo pairatu dituzten emakume guztiei jakinarazten die laguntza behar eta nahi izanez gero, udalak dituen zerbitzu eta baliabideetara jo dezaketela”, jakinarazi dute.
Era berean, argi adierazi dute mota honetako erasoak “gure gizartean oraindik nagusi diren indarkeria matxistaren eta genero desberdintasuneko jarreren adierazpenik higuingarrienak” direla, eta udalak guztiak gaitzesten dituela. Horregatik, udalak uste du “ezinbestekoa” dela lanean jarraitzea, gizarte, mugimendu feminista eta hiriko giza eragileekin batera, “balioetan oinarritutako heziketaren eta gizon eta emakumeen arteko berdintasunaren alde”. Eta sexuen hezkuntza lantzea, horiek kudeatzeko trebetasunak eta baliabideak emateko.
Elkarretaratzea, arratsaldean
Amarako Zapi Moreak kolektibo feministak elkarretaratzea antolatu du auzoan izandako sexu erasoa salatzeko. 19:00etan elkartuko dira, Easo plazan. Udalak jakinarazi duenez, gaitzespena adierazteko hirian egiten diren deialdiekin bat egiten du.
