Irabaztera behartuta doa Reala Son Moixera
Sergio Gomez, Real Madrilen aurka ligan jokaturiko partidan.Reala 
Maila ona ematea eta garaipenak eskuratzea kostatzen ari zaio Realari denboraldi hasiera honetan, baina horri buelta ematen hasteko aukera dauka Imanol Alguacilen taldeak gaur arratsaldean, Mallorcaren etxean (19:00). Larunbatean Real Madrilen aurka galdu arren, ez zuten gaizki jokatu txuri-urdinek, eta realzaleek espero dute horrek bultzada ematea Son Moixen irabazteko. Jagoba Arrasateren aginduetara, balearrek ere ez dute ondo hasi liga, baina, momentuz, Realaren gainetik daude sailkapenean.
Aurreikusi daiteke Alguacilek hainbat aldaketa egingo dituela hamaikakoan, baja batzuk eta errotazioak direla medio. Remiro ziurra da atean, baina Javi Lopezen lesioa dela eta, Aihen sartuko da ezker hegalean, eta baliteke Odriozolak jokatzea hasieratik eskuinetik; aurreikusi daiteke, bestalde, Pachecok eta Zubeldiak jokatuko dutela defentsaren erdian.
Zelai erdiari dagokionez, Zubimendik gidatuko du taldea, aurretik Sergio Gomez eta Turrientes izango dituela. Aurrean, berriz ere, aldaketak aurreikusten dira: Kubo, Oskarsson eta Becker hirukotea izan daiteke Orioko entrenatzailearen apustua, baina ezin da alde batera utzi Barrenetxea eta Oiartzabal ere hamaikakoan sartzeko aukera. Konbinazioa dena dela, irabaztea da txuri-urdinen helburu bakarra, ligan merezi duten lekura ahalik eta azkarren heltzeko.
