Nestor Basterretxea omenduko dute Tabakaleran
Nestor Basterretxea (Bermeo, 1924 – Hondarribia, 2014) artista omenduko dute Tabakaleran, bere jaiotzaren mendeurrenaren harira. Hain zuzen ere, Tabakalerak, Euskadiko Filmategiak eta Donostia Zinemaldiak (SSIFF) proiekzio ziklo berezi bat antolatu dute urrirako. Omenaldi hori Eusko Jaurlaritzak hogei kultura erakunde baino gehiagorekin batera koordinatu duen ospakizun kolektiboaren barruan kokatzen da, eta bere xedea da Basterretxeak euskal kultura eta arte garaikiderako izan zuen garrantzia eta bere legatua nabarmentzea.
Zinemagilea izateaz gain, Basterretxeak pintura, eskultura, diseinua eta ilustrazioa landu zituen, eta diziplina anitzeko artista moduan eta euskal kulturaren defendatzaile sutsu gisa oroitu nahi dute proiekzio hauek. Bere mendeurrenaren ospakizunak urriaren amaierara arte luzatuko dira, eta diziplina anitzeko jarduera ugari hartuko dituzte barne, arte eta gizarte garaikideetan Basterretxeak izan zuen eragina eta bere legatuaren garrantzia nabarmentzeko.
Proiekzioak Tabakalerako zineman
Egitaraua urriaren 4an hasiko da, Gentzane Martinez de Osabak eta Alexander Garcia de Bikuñak zuzendu duten Señales de vida: Nestor Basterretxea dokumentalaren emanaldiarekin. 77 minutuko film honek artistaren bizitza eta lana behatzen du, Basterretxeak 89 urte zituela eta bere bizitzaren une garrantzitsu batean: Arte Ederren Bilboko Museoan egingo zen bere azken atzerabegirakoaren atarian.
Urriaren 5ean, Basterretxeak berak egin zituen zenbait film labur emateko saio bat antolatuko du Tabakalerak. Proiekzioaren aurretik, artistaren artxiboa ikertu duten Elias Querejeta Zine Eskolako (EQZE) Andoni Imaz eta Matias Fajn ikasleek aurkezpena egingo dute.
Film laburren zerrenda
Alquézar. Retablo de Pasión (1966) – Fernando Larruquertekin batera egina. Huescako Alquezar herri txikiaren arte eta arkitektura aberastasuna esploratzen du dokumentalak.
Pelotari (1964) – Fernando Larruquertekin batera egina. Euskal pilotari eginiko omenaldi bat da: pilotaren dimentsio fisikoa esploratzeaz gain, euskal kulturan duen pisu sinbolikoa ere aztertzen du. 1965. urtean dokumental onenaren eta kirol dokumental onenaren sariak eskuratu zituen eta 1964ko Bilboko Nazioarteko Jaialdian Zilarrezko Domina jaso zuen.
Operación H (1963) – Fikzio esperimentaleko lan honetan, bere ahalmen sortzailea eta misterio eta intrigako testuinguru batean narrazio bisualarekin jokatzeko bere gaitasuna agerian utzi zituen Basterretxeak.
Sin título – Film enigmatiko eta labur honek irudi abstraktu eta iradokitzaileen bitartez emozioak transmititzeko Basterretxeak zuen gaitasuna agerian uzten du.
Bi saioak arratsaldeko 19:00etan hasiko dira, Tabakalerako zineman. Sarrerak eskuragai daude dagoeneko, webgunean eta zentroaren informazio puntuan.
