Nortasunaren nahasmenduaren tratamenduari buruzko hitzaldia eskainiko dute hilaren 14an
Buru Osasunaren Nazioarteko Eguna ospatzeko Donostian egin zuten ekitaldi bat, artxiboko irudi batean.Sara Ibarguren 
Buru Osasunaren Nazioarteko Egunaren inguruko jardueren artean, osasun mentalari buruzko urteroko jardunaldia egingo du Agifesek urriaren 14an, Avati Nortasun Nahasmenduen Euskal Elkartearekin lankidetzan. Adituek pertsonalitate nahasmenduen tratamenduko hiru zutabeak nabarmenduko dituzte, bereziki mugako nahasmenduari dagokionean: psikoterapia, ingurune soziofamiliarra eta integrazio psikosoziala.
Topaketa udaletxeko ekitaldi aretoan izango da, 18:00etan, eta interesa duten pertsona guztiei zuzenduta egongo da. Hizlari izango dira Santi Rodriguez psikologoa eta Avatiren egungo presidentea; Xabi Rodriguez psikologoa eta duela hamabi urtetik elkartekidea, eta Marga Lucena Goikoetxea, pertsonalitatearen nahasmenduaren diagnostikoa duen pertsona baten ama, bazkidea eta elkarteko presidenteordea.
Jardunaldian, egun erabiltzen diren tresna terapeutikoak aztertuko dituzte adituek, jarduera psikoterapeutikoa eta komunitarioa bateratuz. Era berean, topaketaren helburua izango da familien baliozkotze eginkizuna nabarmentzea, bai eta diagnostiko hori duten pertsonen trebetasun pertsonalak sustatzeko jarraibideak ematea ere, euren integrazio psikosoziala errazteko eta hutsune sentimenduari aurre egiten lagunduko dien nortasuna sendotzeko.
