Sahararren deportazioak gaitzetsi ditu Saharako Lagunen Euskal Elkarteen Federazioak Bulebarrean
Saharar deportatuei elkartasuna adierazteko elkarretaratzea, Bulebarrean.Sara Ibarguren 
Saharako Lagunen Euskal Elkarteen Federazioak antolatuta, manifestazioa egin dute gaur Bulebarrean, Barajasko aireportuan (Madril, Espainia) konfinatu, eta ondoren, deportatu egin dituzten sahararrei elkartasuna adierazteko.
Aipaturiko federazioaren arabera, abuztuaren amaieratik Barajasko aireportura iritsi dira dozenaka saharar, “Marokoko erregimenak jazarriak, nazioarteko araudiak laguntzen dien autodeterminazioa aldarrikatzen duten ekintzaileak direlako”.
Horiek guztiak, haurrak dituzten familiak eta minbizia duten gaixoak barne, aireportuko bulegoetan konfinatu dituztela salatu dute, “era guztietako baldintza tamalgarrietan”. Hilaren 3an, Espainiako Barne Ministerioak atzera bota zuen guztien asilo eskaera, “Iheslarientzako Nazio Batuen Goi Komisarioaren (ACNUR) aldeko irizpidea gorabehera”.
Era berean, salatu dute ez dela kontuan hartu, Demokraziarako Epaileek gogorarazi dutenez, Giza Eskubideen Europako Auzitegiak (GEEA) Espainia “zigortu” duela Giza Eskubideen Europako Hitzarmeneko artikuluak urratzeagatik (babes judizial eragingarria izateko eskubidea aitortzen dutenak), bizitzeko eskubidea urratzeagatik eta familiek tratu anker edo apalesgarriak jasateko duten aukeragatik.
“Hala ere, Marokoko erregimenarekiko mendetasun maila eta Espainiako Gobernuak sahararren aldarrikapen prozesuari emandako babesik eza direla eta, azken egunotan Barne Ministerioak asiloa eskatzen duten herritar guztiak deportatu ditu”, nabarmendu dute, nahiz eta Mendebaldeko Saharako Erreferendumerako Nazio Batuetako Misio Iraunkorrak (MINURSO) jatorri sahararra egiaztatu, Espainiak 1974an egindako erroldan sartu eta Errefuxiatuentzako Nazio Batuen Goi Komisarioaren (Acnur) aldeko txostenak izan Espainiako lurraldean sartzeko baimena emateko.
Horrelako gertakarien aurrean, Saharako Lagunen Euskal Elkarteen Federazioak “baldintzarik gabeko babesa” helarazi dio saharar herriari, eta gogor gaitzetsi dute “Marokoko erregimen autoritarioaren eranskin gisa jarduten duen Espainiako Ministerio eta Gobernu baten jarduna, nazioarteko zuzenbidea eta giza eskubideak zaintzen dituzten nazioarteko erakunde guztien gomendioei entzungor eginez”.
