«Ez dago arrosa den minbizirik, are gutxiago bularrekoa»
Izan Inurri elkarteko kideek, senideek eta lagunek elkarretaratzea egin dute eguerdian, Bulebarrean, minbizia eta bere albo ondorioak elkarrizketa publikora ekartzeko.
Bularreko Minbiziaren Aurkako Nazioarteko Eguna baliatuta, Izan Inurri elkarteko kideak kalera atera dira, arrosa baino, bularreko minbizia marroia dela aldarrikatzeko. Lagun eta senideen babesean, Bulebarra hartu dute eguerdian, egun honetan egiten diren pinkwashing ekitaldiak arbuiatu, gaixotasuna pairatzen duten emakumeen bizi kalitate hobeagoa aldarrikatzeko: “Ez egun honetako jai giroak, ez alde guztietatik ikusten diren zinta arrosek ez gaituzte islatzen. Ez gara ausartak. Bizi kalitatearekin bizi nahi duten emakumeak gara”.
Ekintzan, halaber, gogoan izan dituzte azken urtean galdutako lagun eta senideak: “Elai, Itziar, Arrate, Irune, Amaia Aitziber, Leire, Maider…. ez dira zenbakiak, gure lagunak ziren; amak, ahizpak, bikotekideak”. Maiderren kasua ekarri dute gogora, izan ere, iaz, egun honetan bertan izan zen elkarretaratzean, bere kideekin, “bizi kalitate hobeagoa” aldarrikatzen.
Izan Inurriko kideek argi dute minbizia arrosa baino, marroia dela, eta minbiziari aurrez aurre begiratzeaz gain, behar moduan izendatu behar dela: “Hainbeste jende hiltzen duen gaixotasun luze eta gogor horri minbizia deitzen zaio. Izenda dezagun horrela”. Era berean, kritiko agertu dira enpresa batzuek euren produktuak sustatzeko erabiltzen dituzten kanpainekin: “Diru kopuru handiak biltzen dira jai giroan askotan, gaixotasunaren benetako aurpegia islatzen ez duten irudiekin eta gure ahalegin pertsonala goraipatzen duten gainditze istorioekin”. Salatu dutenez, halaber, diru bilketa horien zati txiki bat baino ez da bideratzen ikerketara.
Ikerketa eta baliabideak
Inurriek, ordea, ikerketaren garrantzia, baliabide gehiagoren beharra eta diagnostiko goiztiarrak ekarri nahi izan dituzte dute lehen lerrora. Adierazi dute prebentzioko neurri eraginkorrak izateko, beharrezkoa dela behaketa adina eguneratzea, 35 urte azpiko emakumeen artean, diagnostikoak ugaritzen ari baitira. Era berean, kalitatezko ikerketa publikoa eta sendagai berritzaileak lehenbailehen eskura izatea behar beharrezkotzat jotzen dute, baita askotariko diziplinetako tratamendua jasotzea: “Asko dira tratamendu onkologikoen bigarren mailako ondorioak. Horregatik, medikuntza integratibo bat behar dugu gure bizi kalitatea hobetzeko”
Minbizia pairatzen duten pertsonentzako baliabideak eta informazio ulerterraza ezinbestekoa dela jakinda, inurriek erreferentziazko zentroak ez ezik, protokolo bateratuak eta aukera guztien inguruko azalpenak ere eskatu dituzte: “Mastektomiaren ondorengo berreraikitzea, aukera posibleetako bat bezala azaldu behar da”.
Ez dute ahaztu, bestalde, lan munduko ezintasun prozesuetan ere arazo mordoa izaten dituztela. Horiek horrela, langile bakoitzaren beharretara egokitu eta lan bizitzara pixkanaka itzultzeko aukera ematea bermatu dadila eskatu dute.
Jarraian, elkarretaratzeko irudi sorta:
Bularreko minbizia
Bularreko minbizia da emakumeen artean gehien diagnostikatzen den minbizia mota. Tumore mota horrengatik hiltzen diren emakume gehien( 6.677 emakume 2023an). Urtetik urtera kopuruak handitu egiten dira, estatu mailan, eta Espainiako Onkologia Medikoak aurreratu duenez, 2024 urtean zehar, 36.395 kasu berri diagnostikatuko dira.
Era berean, jaso dutenez, minbiziaren intzidentzia %60ra igo daiteke datozen bi hamarkadetan; eta Espainiako Estatuaren kasuan, gorakada emakume gazteen artean izango da, bereziki.
