Horrelako garaipen baten premia zuten
Bera Berak nagusitasun osoz menderatu du Elda, eta sailkapenean gora begira jarri dira.
Bera Bera eta Elda taldeen arteko partida, Gaskan.Bera Bera 
Europa eta liga uztartzea ez da beti erraza izaten. Hori da Bera Bera eskubaloi taldeari gertatu zaiona. Batean aurrera egin duen arren, bestean aurrera egin ezinda dabiltza. Sei partida jokatuta, hiru irabazi, bat berdindu eta bi galdu dituzte. Ezohikoa da donostiarrentzat, baina erregulartasuna denboraldian zehar lortzen ahalegindu beharko dira. Horretarako, lehen urratsa egin zuten larunbatean Eldari irabazita (38-22). Partida ona jokatu zuen Bera Berak, eta garaipen garrantzitsua izango da beraientzat.
Futbolean, kale eta bale Realarentzat. Neskek partida lehiakorra jokatu zuten Atletico Madrilen zelaian, eta badirudi neurria hartuta dietela. Ordea, galdu egin zuten (1-0). Dena dela, ezin esan txuri-urdinen bolada ona eten denik. Ligako talde indartsuen aurka ez dute punturik batu, baina gero eta gertuago daude. Mutilek, berriz, neurketa bikaina jokatu zuten Gironaren zelaian, eta garaipen ederra eskuratu zuten (0-1). Mikel Oiartzabal kapitainak egin zuen gol bakarra. Bertsiorik onena berreskuratzen ari da Eibarkoa. Txuri-urdinek alde handiagoarekin irabazteko aukerak izan zituzten, eta baita etxekoek partida berdintzeko ere. Kontuak kontu, urrezko hiru puntu ekarri dituzte Donostiara.
Saskibaloian, Ibaeta Basketek eta Gipuzkoa Basketek etxeko lanak ondo baino hobeto bete zituzten. Emakumezkoen taldeak Europako joko ona ligan berretsi zuen Estudiantes indartsuak mendean hartzeko (68-56). Balio bereziko garaipena da Azu Muguruzak gidaturiko taldearentzat. Gizonezkoek ere irabazi egin zuten Illunben, Moron taldea gaindituta (65-52). Bai ala bai irabazi beharreko partida zen, eta lortu zuten.
Izotz hockeyan, Txuri Urdineko bi taldeek daramaten bolada mantendu zuten asteburuan. Neskak sendo dabiltza, eta berriz ere irabazi egin zuten. Oraingoan, Huarte nafarrei (1-4). Sailkapeneko lehen postuan egonkortu dira. Aldiz, mutilek bi aldiz neurtu dituzte indarrak asteburuan, Logroñoko Milenio Panthersen kontra. Larunbatean, galdu egin zuten penaltietan, arauzko denboran 6-6 berdindu ostean (6-7). Atzo, berriz, irabazi egin zuten donostiarrek (4-2).
Azkenik, belar hockeyan, Realak astindua jaso zuen atzo Zubietan, Juniorren partetik (0-4). Hasieratik gainditu zituzten txuri-urdinak, eta ez ziren gai izan bisitariei aurre egiteko. Kolpe gogorra izan zen Realarentzat.
EMAITZAK
Eskubaloia
Emakumezkoen liga, 6. jardunaldia
- Bera Bera 38 — Elda 22
Futbola
Emakumezkoen liga, 7. jardunaldia
- Atletico Madril 1 — Reala 0
Gizonezkoen liga, 10. jardunaldia
- Girona 0 — Reala 1
Saskibaloia
Emakumezkoen liga, 3. jardunaldia
- Ibaeta Basket 68 — Estudiantes 56
Gizonezkoen bigarren mailako liga, 4. jardunaldia
- Gipuzkoa Basket 65 — Starlab Moron 52
Izotz hockeya
Emakumezkoen liga, 5. jardunaldia
- Huarte 1 — Txuri Urdin 4
Gizonezkoen liga, 5. eta 21. jardunaldia
- Txuri Urdin 6 — Milenio Panthers 7
- Txuri Urdin 4 — Milenio Panthers 2
Belar hockeya
Emakumezkoen liga, 6. jardunaldia
- Reala 0 — Junior 4
