Hiru adingaberi eraso egin zion masajistak haren kontrako epaia baliogabetzeko eskatu du
Masaje zentroaren parean egindako elkarretaratze bat.Iñaut Gonzalez de Matauko Rada 
2021ean masajista bat atxilotu zuten hiru adingaberi sexu erasoak egiteagatik. Gipuzkoako Fiskaltzak 45 urteko espetxe zigorra eskatu zuen; hamabost urte biktima bakoitzarengatik. Ordea, masajistaren defentsak haren kontrako epaia baliogabetzeko eskatu duela jakinarazi du EFE agentziak. Batez ere, zigor eskaera “gehiegizkoa” dela dio akusatuak, eta Gipuzkoan kasu “larriagoak” daudela.
Espetxe zigorrarekin batera, fiskaltzak beste hainbat zigor ezartzea proposatu zuen: adingabeekin harremana izatea dakarren edozein lan egiteko gaitasungabetzea, biktimengana edozein bitartekoren bidez hurbiltzeko eta haiekin komunikatzeko debekua, eta biktimetako biri 50.000 euro, eta hirugarrenari, 60.000 euro ematea.
Auzipetua biktimekin harremanetan jartzen zen bere semearen eta bikotekidearen alabaren bitartez, biak adingabeak. Biktimekin harremanetan jarri ondoren, masajeak doan egiteko eskaintzen zien, “adingabeek jasan zezaketen tentsioa, antsietatea eta estresa arintzeko”.
Fiskaltzak azaldu zuenez, 2021aren hasieran adingabeek onartu egin zuten akusatuak proposatutako masajeak jasotzea. Orduan erasotzen zituen gizonak, “atzamarrak biktimen baginetan sartuz eta bularrak toallaren azpitik ukituz”.
30 eta 40 minutu arteko iraupena zuten gutxi gorabehera, eta saioak normalean auzipetuaren kontsultan egiten ziren, nahiz eta masajeren bat familiaren etxeren batean egin. Saioen ondoren, auzipetuak behin eta berriz esaten zuen telefonoz hitz egiten zuten eta kontsultan gertatzen zen guztia “haien artean geratzen zela” eta ez ziotela inori kontatu behar.
