Ancorak Arte Ederren eraikineko «ezkutuko obren» aurkako salaketa jarri du Ertzaintzan
Arte Ederren eraikina, obretan.Ancora 
Ancora elkarteak salaketa jarri du Ertzaintzan, Arte Ederren eraikinean egiten ari diren “ezkutuko obren” aurka. Izan ere, joan den irailaren 30ean, Ancorak idatzi bat erregistratu zuen udaletxean, Arte Ederren eraikineko inguratzaile babestua mailuka suntsitu zutela salatuz, “lona opako baten atzean ezkutatuta”. Bada, elkarteak salatu du udalak ez diola idatziari erantzun, eta “ezkutuko obrek” aurrera jarraitzen dutela. Horren aurrean, salaketa bat jartzea erabaki du Ancorak.
Urriaren 8an, Orruño udal arkitektoak txosten bat egin zuen Arte Ederren eraikineko argazkiekin, “hirigintzako arau haustea berresteko”. Zehaztu dutenez, bigarren eta hirugarren solairuetan “ez da baoen zabaltze puntual eta indibidualizaturik egin; aitzitik, fatxadaren zati osoak kendu dira, eta hori ez dator bat HOEBPBaren arau partikularrean ezarritakoarekin”.
Ancorak azaldu duenez, jarduera horiek ere ez daude baimenduta 2021eko irailean emandako udal lizentziaren bidez; izan ere, “lizentzia horrek berariaz baztertzen zituen eraisteko eta ondoren berreraikitzeko lanak”.
Euskal Autonomia Erkidegoko Lurzoruari eta Hirigintzari buruzko Legeak honako hau ezartzen du 220. artikuluan, Ancoraren arabera: “Alkateak, edozein bide erabiliz, ezkutuko obrak edo erabilerak egiten ari direla jakiten duenean, obra edo erabilera horiek berehala eteteko aginduko du”. Etenaldi hori arautua da, eta, beraz, egitateak egiaztatu ondoren, udal errejidoreak neurri hori hartzeko agindua eman beharko du nahitaez; bestela, agintari eta funtzionario publikoei eska dakiekeen diziplina erantzukizunaren kasuan eroriko da.
Elkarteak nabarmendu duenez, katalogatutako ondasunak suntsitzea “arau hauste oso larria” da, lege beraren 225. artikuluaren arabera. “Udalak bere zehatzeko ahala erabili behar du eta ezin du bere burua inhibitu, Arartekoak 2024ko irailaren 9ko ebazpenean gogoratzen duen bezala, eta baita udaleko idazkariaren txosten juridikoak berak ere, joan den urriaren 3koa”, gogorarazi du Ancorak.
Ordea, Ancorak salatu du obrak gelditu beharrean, “ezkutuko obrek nabarmen egiten dutela aurrera”, eta hala ikusten da “kupula berri bat jarri berri dutelako”, sozietate sustatzaileak 2015eko urrian suntsitutako jatorrizkoaren ordez.
Elkarteak gogorarazi du Arte Ederren eraikina estatuan Ondarearen Nazioarteko Alerta duen eraikin bakarra dela.
