Azaroaren 18an abiatuko da 2025eko Hiritar Merezimenduaren Dominak aukeratzeko prozesua
Abenduaren 1era arte aurkeztu ahalko dira hautagaitzak.
Aurtengo Hiritar Merezimenduaren Dominen ekitaldia, udaletxean.Sara Ibarguren 
Datorren astelehenetik, hilaren 18tik hasita, erroldatuta dauden donostiarrek Hiritar Merezimenduaren Dominak aukeratzeko proposamenak aurkeztu ahal izango dituzte abenduaren 1era bitartean. Herritarrekin batera, hiriko elkarteek ere hautagaiak aurkeztu ditzakete.
Proposamenak Internetez egin ahal izango dira udalaren webgunean. Horrela behar duten pertsonek, Herri Partaidetza Zerbitzuaren bulegoetan laguntza jasoko dute online plataformaren bidez proposamena egin ahal izateko. Ez dago proposamenen kopuruan mugarik, baina proposamen bakoitzerako fitxa independente bat bete behar da.
Epe hau bukatuta, Idazkaritza Orokorrak eta Herri Partaidetza Zerbitzuak proposamenak aztertuko dituzte abenduaren 5etik 13ra bitartean. Txostenak udaleko Bozeramaileen Batzordera bidaliko dira.
Abenduaren 19an, Batzordeak gehienez bost hautagai aukeratuko ditu. Bozketa amaitu ondoren, eta prozesua egiaztatu ostean, udalak argitaratuko ditu hautagai irabazleen izenak, eta udalbatzak berretsiko ditu.
