Parte Zaharreko merkataritza sustatzeko kanpaina bat abiatu dute
Donostiako Udalak Parte Zaharreko merkataritza laguntzeko Zaindu maite duzun hori kanpaina aurkeztu du: “Auzoko 60 denda baino gehiago batu dira Donostiako auzo historiko honen balioa eta nortasuna nabarmentzeko”. Donostia Shops-ek garatu du eta Donostia Sustapenaren Open Dendak programaren barruan dago.
Kanpaina honen bidez , donostiarrak eta bisitariak kontzientziatu eta sentsibilizatu nahi dituzte” hiriko auzo enblematiko hori zaintzearen eta errespetatzearen garrantziaz, hurbiltasuneko merkataritzan arreta berezia jarriz”.
Ane Oiarbide Ekonomia eta Tokiko Enpleguko zinegotziaren arabera, “negozio horiek, horietako asko ehun urtekoak eta sarituak, aberastasun aparta ematen diote Donostiako merkataritza-sareari, eta kalitatearen, arretaren eta egokitzapenaren adibide argia dira, denboran zehar”.
Hainbat jarduera
Kanpaina horren barruan, hainbat jarduera egingo dituzte azaroa eta abendua bitartean. Hasteko, Kolorekak diseinaturiko kartelak aurkeztu dituzte, dagoeneko Parte Zaharreko hainbat lekutan jarri dituztenak.
Gainera, auzoko 60 saltokik beren erakusleihoak apainduko dituzte diseinu horietako biniloekin. Aste honetan, Adrian Iribarren, Sofia Herboikoa, Jabier Rodriguez eta Maialen Arozena bertako artistek esku hartze artistikoak egingo dituzte in situ, erakusleihoak eskuz egindako sorkuntzekin, bertara hurbiltzen den jendeak zuzenean ikus dezan eta auzoari merkataritzak ematen dion balio kulturala nabarmendu nahi duen esperientzia horretaz goza dezan.
Jarduera hau Zaharrean Parte Zaharreko merkatarien elkartearen eta Parte Zaharrean Bizi auzo elkartearen lankidetzari esker garatu dute. Horrekin kaleak kolorez betetzea lortuko da eta herritarrei gogoraraziko zaie hurbileko merkataritzan zaintzea eta kontsumitzea garrantzitsua dela ingurunea errespetatuz eta balioztatuz.
