Ekintza ikastola aukeratu dute hezkuntza berriztatzeko programa baterako
Ekintza ikastolako haurrak.Ekintza 
Ikastetxeen ikerkuntza gaitasuna indartzea helburu duen Entre Escuelas programan parte hartuko du Ekintza ikastolak. EAEko ikastetxe bakarra izango da, eta Espainiako beste 26 ikastetxerekin batera ariko da. Aipaturiko programa EduCaixak Londresko University Collegeko (UCL) Institute of Education (IOE) erakundearekin lankidetzan sustaturikoa da.
Programa hau irakasleei prestakuntza eta laguntza emateko da, beren ikastetxeetan ebidentzien bidez informatutako hobekuntza prozesuen buru izan daitezen. “Parte hartzeak berrikuntzaren eta etengabeko hobekuntzaren aldeko konpromisoa berresten digu, Ekintza ikastola hezkuntza erreferente gisa bultzatzen jarraitzeko, ez bakarrik Donostian edo Gipuzkoan, baita Euskadin ere”, adierazi du Uxue Arrazola zuzendariak.
Ikastetxeak aukeratzeko irizpideak haien proposamenen bideragarritasunean eta potentzial eraldatzailean oinarritu dira. Ekintza ikastolak Metakognizioa eta ikaskuntza autoarautua proiektua landuko du. “Proiektu horren helburua ikastolako haur eta gazteen ikaskuntza lantzeko moduan hobekuntzak ezartzea da, betiere ikasleen aniztasun funtzionala kontuan hartuta. Hau da, ikasle bakoitzak bere ikaskuntza kontziente egin ahal izatea, trebetasunak, mugak, tresnak, aurretiazko ezagutzak, ezagutza berriak, aurrerapenak eta haien aplikazio praktikoa identifikatzea, bizitzan sortzen zaizkion egoerei aurre egiteko. Horretarako, funtsezkoa da nork bere burua hobeto ezagutzeko estrategiak aplikatzea, ikasleek lana eta helburuak argi izatea, hura planifikatzeko gai izatea, haren jarraipena egitea eta autoebaluazioa egitea. Zer ikasi dut? Nola ikasi dut? Zertarako balio izan dit eta beste noiz erabil dezaket? Prozesu hau aurrera eramaten laguntzen duten galderak dira”, azaldu du ikastetxeak.
Aintzane Inzak eta Miren Caminosek, Lehen Hezkuntzako eta DBHko arduradunek azaldu dutenez, “irakaslearen eta irakaskuntzaren zeregina aldatuz joan da. Ikaskuntza autoarautuaren bidez, ikasleak beren ikaskuntza-prozesuaren protagonista izatea nahi dugu, beren emozioen, jarreren eta ezagutzen kudeaketaz jabetzea, ikaskuntza-prozesu eraginkorragoa egiteko”.
Bigarrenez egingo dute Entre Escuelas programa, Bartzelonan hasiko da hilabete honetan, eta urrira arte luzatuko da. Parte hartzen duten ikastetxeei aukera ematen die hobekuntza proposamenak ebaluatzeko eta ezartzeko, eta elkarri euskarria emateko 3 taldetako 9 hirutan, ikastetxeetara bisitak eginez eta prozesuan zehar elkarri lagunduz.
